दिव्यताराको सातौं सेवा केन्द्र बाँसपानीमा शुभारम्भ

१३ चैत, हेटौँडा । हेटौँडा–२ मा रहेको दिव्यतारा बहुद्देश्यीय सहकारी संस्था लिमिटेडको सातौं सेवा केन्द्र मकवानपुरगढी वडा नम्बर २ बाँसपानीमा शुभारम्भ भएको छ । सेवा केन्द्रको बुधबार ३ नम्बर प्रदेश प्रमुख प्रतिपक्षी दलका नेता एवं नेपाली कांग्रेस मकवानपुरका सभापति ईन्द्रबहादुर बानियाँले शुभारम्भ गरेका हुन् । 
कार्यक्रममा बोल्दै नेता बानियाँले सहकारीले ग्रामिण भेगको जीवनस्तर उकास्न महत्वपूर्ण भूमिका खेल्न सक्ने बताए । समुदायमा सहकार्यको भावना अभिबृद्धिमा समेत सहकारीले योगदान गरेको भन्दै उनले बचत तथा ऋणको सेवा लिई आफ्नै गाउँमा बसेर आर्थिक उपार्जनको काम गर्न समेत स्थानीयलाई सुझाव दिए । 
सहकारीका कार्यवाहक अध्यक्ष डा. गणेश लामा बलको सभाध्यक्षतामा भएको कार्यक्रममा गढी वडा नम्बर २ का अध्यक्ष बखानसिं पाख्रिन, जिल्ला बहुद्देश्यीय सहकारी संघकी सचिव शर्मिला डंगोल, चन्द्रसूर्य बचत तथा ऋण सहकारी संस्थाका अध्यक्ष गोपालप्रसाद गौतम, व्यवसायी नवराज न्यौपाने, संस्थाका लेखासमिति संयोजक प्रकाश खतिवडा लगायतले मन्तव्य व्यक्त गरेका थिए । 
कार्यक्रममा वडा सदस्यहरु, सहकारीका पदाधिकारी, कार्यसमिति सदस्य, स्थानीय सहकारी संस्थाका प्रतिनिधि र सर्वसाधारणको सहभागिता रहेको थियो । दिव्यताराले यसअघि पालुङ, राईगाउँ, हर्नामाडि, पदमपोखरी, मनहरी र सान्नानीटारमा सेवा केन्द्र संचालनमा ल्याईसकेको छ ।