प्रदेशसभामा एक विधेयक पारित, ४ समितिमा र ३ प्रस्तुत

२५ चैत, हेटौँडा । प्रदेशसभा बैठकमा सोमबार एक विधेयक पारित भएको छ । त्यसैगरी, ४ विधेयक समितिमा दफावार छलफलका लागि गएको छ भने ३ विधेयक प्रदेशसभामा प्रस्तुत भएको छ ।
बैठकमा आन्तरिक मामिला तथा कानून मन्त्री शालिकराम जम्कट्टेलद्वारा प्रस्तुत प्रदेशस्तरीय केही सार्वजनिक लिखित प्रमाणिकरण ऐन संशोधन गरेको विधेयक सर्वसम्मत पारित भएको छ । विधेयकमा संशोधन हालेकी प्रदेशसभा सदस्य सिता लामाले संशोधन फिर्ता लिएपछि सर्वसम्मत पारित भएको हो । त्यसैगरी, आन्तरिक मामिला तथा कानून मन्त्री शालिकराम जम्कट्टेलद्वारा प्रस्तुत प्रदेश सूचनाको हकसम्बन्धी विधेयक र प्रदेशसभाका पदाधिकारी तथा सदस्यहरुको पारिश्रमिक तथा सेवा सुविधासम्बन्धी संशोधन प्रदेश मामिला समितिमा दफावार छलफलका लागि सर्वसम्मत पठाईएको छ । 
त्यसैगरी, आर्थिक मामिला तथा योजनामन्त्री कैलाश ढुंगेलद्वारा प्रस्तुत कर तथा गैरकर राजस्वसम्बन्धी संशोधन विधेयक अर्थ तथा विकास समितिमा र सामाजिक विकास मन्त्री युवराज दुलालद्वारा प्रस्तुत प्रदेश बालबालिका सम्बन्धी विधेयक स्वास्थ्य तथा कृषि समितिमा दफावार छलफलका लागि पठाईएको छ ।
बैठकमा कृषि तथा भूमि व्यवस्था मन्त्री दावादोर्जे लामाद्वारा प्रस्तुत प्रदेश विउ विजन सम्बन्धी विधेयक, प्रादेशिक कृषि व्यवसाय सम्बन्धी विधेयक र उद्योग, पर्यटन, वन तथा वातावरण मन्त्री अरुण नेपालद्वारा प्रादेशिक व्यापार सम्बन्धी विधेयक प्रस्तुत भएको छ । अघिल्लो बैठकको विशेष समयमा उठाएको प्रश्नको मूख्यमन्त्री डोरमणी पौडेलले जवाफ दिएका थिए । बैठक मंगलबार दिउँसो १ बजे बस्ने भएको छ ।