सांसद ईन्द्र बानियाँँ मन्त्री बन्ने

८ मंसिर, हेटौंडा । मकवानपुर क्षेत्र नम्बर १ का सांसद एवम् नेपाली कांग्रेस मकवानपुरका सभापति ईन्द्रबहादुर बानियाँ मन्त्री बन्ने करिव निश्चित भएको छ । कांग्रेस बानियाँसहित ७ जना राज्यमन्त्री बनाउन लागेको हो । राष्ट्रिय संचारमाध्यम कान्तिपुरको अनलाइन संस्करण ई-कान्तिपुरले यसलाई यसरी समाचार बनाएको छ ।

सत्तारुढ नेपाली कांग्रेसले पार्टीबाट मन्त्रिपरिषदमा थप ७ जना राज्यमन्त्री पठाउने भएको छ । सभापति शेरबहादुर देउवाले नेताहरु रामचन्द्र पौडेल, कृष्णप्रसाद सिटौला र खुमबहादुर खड्कासँग राज्यमन्त्रीमा नियुक्त गर्नेहरुको अन्तिम नामावली सङ्कलन गरिसक्नु भएको उहाँ निकट स्रोतले बताएको छ ।

कंग्रेस उच्च स्रोतका अनुसार शुक्रबार ती राज्यमन्त्रीहरु थपिनेछन् । सिटौला र खड्कालाई १–१ र पौडेललाई २ राज्यमन्त्रीको नाम सिफारिस गर्न देउवाले भन्नु भएको थियो । सोही अनुसार सिटौलाले संखुवासभाका तारामान गुरुङ्ग र खड्काले मकवानपुरका इन्द्र बानियाँलाई सिफारिश गर्नुभएको छ ।

त्यस्तै सभापति देउवाले रुकुमकी मिठु मल्ल, गुल्मीका स्वर्ण जुहारचन , कैलालीका दीर्घराज भाट र पौडेलले संखुवासभा दीपक खड्का र कास्कीका जीवन परियारको नाम सिफारिश गर्नुभएको छ ।  सरकार गठन भएको झण्डै ४ महिनापछि चौथोपटक मन्त्रिमण्डल बिस्तार हुन लागेको हो । मन्त्री परीषदमा हाल कंग्रेसबाट १४ जना मन्त्री छन् ।