सांसदहरुको माग : राजधानीको विषय तत्काल आउनुपर्यो

४ बैशाख, हेटौँडा । ३ नम्बर प्रदेशसभाका सांसदहरुले प्रदेशको स्थायी राजधानी बारेको विषय किन नआएको भन्दै प्रश्न गरेका छन् । 
बुधबार बसेको बैठकको शुन्य समयमा बोल्ने सांसदहरुले राजधानीको विषय छिटै टुंगो लगाउनुपर्ने बताएका हुन् । बैठकमा प्रदेशसभा सदस्य छिरिङदोर्जे लामाले प्रदेश सरकार भुमरीमा परेको भन्दै प्रदेशसभाले आफ्नो अधिकार प्रयोग गर्नुपर्नेमा जोड दिए । उनले संवैधानिक व्यवस्था अनुसारको प्रदेशको स्थायी राजधानीको निर्णय गर्ने अधिकार प्रदेशसभालाई रहेको भन्दै यसको प्रयोग गर्नुपर्ने उनको भनाई थियो । उनले प्रदेश सरकार राजधानीको विषयमा यति लामो समयसम्म अलमलिएको भन्दै आचोचना गरे । 
सांसद जीवन डंगोलले राजधानी अध्ययन विशेष समितिको प्रतिवेदन तयार भएको ७ महिना वितिसक्दा पनि यसबारे निर्णय गर्न नसकेको भन्दै आपत्ति जनाईन् । उनले गणितीय आधारमा दुई तिहाई भएपनि सरकारको पराजित मानसिकताका कारण राजधानीको विषय अघि नबढेको भन्दै यही हिउँदे अधिवेशनबाट यसको निर्णय गर्न ध्यानाकर्षण गराईन् । 
प्रदेशसभा बैठकमा सांसद जगत सिंखडा र ईन्द्रमाया गुरुङले योजना सम्झौतामा ढिलाई भईरहेको र यसले विकास प्रभावित भएको भन्दै सरकारको ध्यानाकर्षण गराएका थिए । त्यस्तै, सांसद कल्पना नेपालीले प्रदेश सरकारले समेत दलित समुदायलाई अवमूल्यन गरेको गुनासो गरिन् । उनले प्रदेश सरकारको मन्त्रीमण्डलदेखि विषयगत समितिका सभापतिहरुसम्मको नेतृत्वमा दलितलाई उपेक्षा गरेको भन्दै समावेशी अवधारणा अवलम्बन गर्न सुझाव दिईन् । 
प्रदेशसभा बैठकमा सांसदहरुले विद्यालय भर्ना अभियान, विकासदेखि बाँदरका समस्याका बारेमा समेत आफ्नो धारणा राखेका थिए । पहिलो पटक शुन्य समयको व्यवस्था गरेर क्रम संख्या ३६ सम्मका प्रदेशसभा सदस्यहरुलाई बोल्ने व्यवस्था मिलाएकोमा १४ जनाले मात्रै आफ्नो धारणा राखेका थिए ।