हेटौँडा–८ कमानेमा बम जस्तो शंकास्पद वस्तु भेटियो 

५ वैशाख, हेटौँडा । हेटौँडा उपमहानगरपालिका वडा नम्बर ८ को कार्यलय अगाडी कुकर बम जस्तो देखिने शंकास्पद वस्तु फेला परेको छ ।  नेत्र विक्रम चन्द विप्लव नेतृत्वको नेपाल कम्युनिष्ट पार्टीले आयोजना गरेको बन्दको दिन वडा कार्यलय अगाडी उक्त शंकास्पद वस्तु फेला परेको हो ।
कार्यलयको गेट अगाडी कालो प्लास्टिकमा रहेको कुकरमा बम लेखेर राखिएको अवस्थामा स्थनियले देखेका थिए । अहिले उक्त स्थानमा प्रहरी पुगिसकेको छ भने बम डिस्फोज गर्ने नेपाली सेनाको टोली पनि घटनास्थल पुगेको छ । 
नेत्रविक्रम चन्द विप्लव नेतृत्वको नेकपाले आह्वान गरेको बन्दको कारण विहानै देखी राजमार्गमा सवारीको आवतजावत ठप्प भएको छ । बजार क्षेत्र पूर्णरुपमा बन्द रहेको छ । 
राजमार्ग तथा बजार क्षेत्रमा रातीदेखि नै नेपाल प्रहरी तथा सशस्त्र प्रहरी खटाइएको छ । बन्दको क्रममा मकवानपुरमा हालसम्म कुनै अप्रिय घटना नभएको मकवानपुर प्रहरीले जनाएको छ । 
सरकारले लगाएको प्रतिबन्धको विरोध, पक्राउ परेका पार्टीका नेता कार्यकर्ताको रिहाइ, झूट्टा मुद्दा खारेजीलगायत मागसहित भ्रष्टाचार, तस्करी, राष्ट्रघात गर्नेकोविरुद्ध नेपाल बन्दको आह्वान गरिएको नेकपाले जारी गरेको विज्ञप्तिमा उल्लेख छ ।
आजको बन्द ओली सरकार घोषणा गरेको प्रतिबन्धबिरुद्धको चरणवद्द आन्दोलनको सुरुवात भएको नेकपाले जनाएको छ ।