कुस्तीमा बीरगञ्जका सुमिर विजयी

१० मंसिर, हेटौँडा । हेटौंडामा जारी राष्ट्रिय खेलकुद तथा वृहत व्यापार महोत्सवमा भएको कुस्ती प्रदर्शनीमा वीरगञ्जका सुमिरकुमार शाह विजयी भएका छन् । शुक्रबार उनले फाइनल भिडन्तमा भारतका सुलिन सहनीलाई पराजित गरेका हुन् । दक्षिण कोरियामा भएको एसियन गेम २०१४ र १२ औं दक्षिण एसियाली खेलकुद प्रतियोगितामा
नेपालको तर्फबाट सहभागी भएका शाहले विजयी भएसंगै नगदसहित पुरस्कार प्राप्त गरेका छन् । मकवानपुरमा पहिलो पटक आयोजना भएको कुस्ती खेल हेर्न अवलोकनकर्ताहरुको भीड लागेको थियो । कुस्ती तर्फ १८ जना खेलाडी सहभागी भएकोमा १५ जना भारतीय र ३ जना नेपाली खेलाडी रहेका थिए । यस्तै महिलाको कुस्ती समेत प्रस्तुत गरिएको प्रतिष्ठानका प्रथम उपाध्यक्ष एवम् खेलकुद समितिका संयोजक सविन भट्टाचार्यले जानकारी दिए ।

‘मकवानपुरमा कुस्तीको खेल पहिलो पटक आयोजना गरिएकोले पनि हुनसक्छ यसलाई धेरैले खुब चाखले हेरेको पाइयो’ प्रतिष्ठानका अध्यक्ष भेष खड्कीले भने, ‘मेलामा अब फुल कन्ट्याक्ट कराँते र एपीएफ तथा न्यू डायमण्ड क्लवको मैत्रीपूर्ण भलिबलको खेल बाँकी रहेको छ ।’ मंसिर २ गतेबाट सञ्चालन भएको राष्ट्रिय खेलकुद तथा वृहत व्यापार महोत्सव १३ गतेसम्म सञ्चालन हुनेछ ।