बन्छन् त कमल थापा फेरि उपप्रधानमन्त्री ?

१२ मंसिर, हेटौँडा । संविधान संशोधनको पक्षमा दुई तिहाइ मत पुर्याउन प्रधानमन्त्री पुष्पकमल दाहालले राप्रपा अध्यक्ष कमल थापालाई उपप्रधानमन्त्री बन्न आग्रह गरेका छन् । प्रमुख प्रतिपक्षी नकेपा एमाले संशोधनमा सकारात्मक नदेखिएपछि प्रचण्डले थापालाई उपप्रधानमन्त्री दिएर संशोधनको पक्षमा दुई तिहाई जुटाउन कसरत गरेका हुन् । 
प्रचण्डको आग्रहसँगै केपि ओली नेतृत्वको सरकारमा उपप्रधानमन्त्रीसहित परराष्ट्र र स्थानीय विकास मन्त्री बनेका थापा फेरि उपप्रधानमन्त्री बन्छन् त भन्ने प्रश्न सर्वसाधारणले गर्न थालेका छन् । सरकारबाट बाहिरिएको करिव चार महिनाभित्रै फेरि सरकारमा जान नहुने मत केही राप्रपा कार्यकर्तामा छ भने सम्मानजनक अवस्थामा पुनः सरकारमा जानुपर्ने केहीको धारणा छ । 
सधैं सरकारमा गईरहदा सत्ता बाहिर रहन नसक्ने भन्ने आरोप लाग्न सक्ने भएकाले अहिले पार्टी एकिकरणको अभियानलाई तल्लो तहसम्म पुर्याउँदै संगठन बलियो बनाउनुपर्ने सामाजिक सञ्जालमा सक्रिय कार्यकर्ताहरुको भनाई समेत आईरहेको छ ।
राप्रपा र राप्रपा नेपालबीच एकिकरण भएको केही दिनभित्रै आएको प्रस्तावबारे गम्भिर छलफल हुनुपर्ने केन्द्रीय स्तरमा बहस शुरु भएको छ । आइतबार संसदिय दलको नेतामा अध्यक्ष थापा चयन भएसँगै सरकारबारेको बहस पनि अघि बढ्नुपर्ने केही नेताको बताउँदै आएका छन् । तर प्रचण्डको आग्रहबारे स्वयम् अध्यक्ष एवं संसदिय दलका नेता थापाले केही जवाफ दिएका छैनन् । एकिकरण नहुँदा पशुपति शम्सेर नेतृत्वको राप्रपा सरकारमा समेत भएको थियो भने एकिकरणपछि पनि सरकार छाडेको छैन ।
संसदमा ३७ सिट रहेको राप्रपाले संविधान संशोधनमा सहयोग गरे सहज अवस्था आउने भन्दै सरकारमा सहभागिताका लागि थापालाई मनाउन नेपाली काँग्रेस र माओवादी केन्द्रका नेताहरु सक्रिय बनेका छन् । राप्रपा अध्यक्ष थापाले मधेशका माग सम्बोधन गरेर संविधान कार्यान्वयनमा जुट्नुपर्ने अन्यथा गलत तत्वले फाइदा लिने अभिव्यक्ति दिंदै आएका छन् । 
उनले पछिल्ला दिनमा दिएका अभिव्यक्तिले सरकारमा जानेबारे नप्रष्ट्याए पनि संशोधनमा सहयोग गर्न सक्नेतर्फ संकेत गरेको छ ।