के छ बाबुराम–उपेन्द्रको संयुक्त विज्ञप्तिमा ?

१३ मंसिर, हेटौँडा । संविधान संशोधनको विषयलाई लिएर नयाँ शक्ति नेपालका संयोजक डा. बाबुराम भट्टराई र संघिय समाजवादी फोरमका अध्यक्ष उपेन्द्र यादवले सोमबार संयुक्त विज्ञप्ति जारी गरेका छन् । संविधान संशोधनको विषयमा आफुहरुको गम्भिर ध्यानाकर्षण भएको भन्दै भट्टराई र यादवले संयुक्त विज्ञप्ति जारी गरेका हुन् ।

विज्ञप्तिमा सबै खाले विभेदको अन्त्यका लागि संविधानलाई संशोधनद्वारा सच्याउनुपर्ने उल्लेख गरिएको छ । संविधान संशोधन गर्दा वर्गिय, जातिय, लैंगिक, भाषिक, सांस्कृतिक, धार्मिक र क्षेत्रीय भेदभावको अन्त्य गरिनुपर्ने जनाउँदै विज्ञप्तिमा यसका लागि मधेशी, थारु, आदिवासी जनजाति, खस, मुस्लिम, दलित, उत्पीडित, उपेक्षित र अल्पसंख्यक समुदाय तथा पिछडिएका क्षेत्रका लगायतका समस्यालाई सम्बोधन गरिनुपर्ने उल्लेख छ ।

विज्ञप्तिमा राष्ट्रिय पहिचानको मान्यता, अधिकारसहितको संघियता, पूर्ण समानुपातिक प्रतिनिधित्व हुने संसद, जनताद्वारा प्रत्यक्ष निर्वाचित कार्यकारी राष्ट्रपति, राज्यका सबैं अंगमा समानुपातिक समावेशीकरण, बहुभाषिक नीति, स्वायत्तता तथा स्वशासन, संघिय न्यायपालिका, प्रादेशिक क्षेत्राधिकारभित्र स्थानीय तह र विशेष संरचना रहने व्यवस्था, सामाजिक न्याय र समाजनाको अधिकार सुनिश्चित हुनुपर्नेमा जोड दिईएको छ ।

‘यि महत्वपूर्ण राष्ट्रिय मुद्धालाई सम्बोधन नै नहुने गरी गरिने संशोधनले मुलुकको समस्या समाधान हुन नसक्ने मात्रै होईन, संविधानको स्वीकारोक्ति र कार्यान्वयन पनि हुन सक्दैन । यसले शान्ति, स्थिरता र विकासको सट्टा मुलुकलाई थप द्वन्द, अन्यौलता र अस्थिरतातर्फ धकेल्ने कार्य हुनेछ ।’–विज्ञप्तिमा भनिएको छ ।