कम्युनिष्ट सरकार हिटलरको बाटोमाः केन्द्रीय सदस्य केसी

२७ वैशाख, हेटौँडा । नेपाली कांग्रेसका केन्द्रीय सदस्य एवम् पूर्व मन्त्री अर्जुन नरसिंह केसीले केपी शर्मा ओली नेतृत्वको कम्युनिष्ट सरकार हिटलरको बाटोमा अघि बढेको आरोप लगाएका छन् । 
नेपाल विद्यार्थी संघ वन संकायको आयोजनामा बिहिबार हेटौंडामा भएको स्वागत, सम्मान एवम् सांस्कृतिक कार्यक्रमका प्रमुख अतिथि रहेका उनले दुई तिहाई बहुमतको दम्भका कारण मुलुक नै खतरामा फस्ने संकेत देखिएको बताए । 
नेता केसीले दासता, निरंकुशता एवम् एकाधिकारको बिरुद्ध लड्न नेवि संघका नेता कार्यकर्तालाई अनुरोध समेत गरे । 
यस्तै कार्यक्रममा नेपाली कांग्रेस ३ नम्बर प्रदेश संसदीय दलका नेता ईन्द्रबहादुर बानियाँले पढाईसंगै विद्यार्थीले राजनीति समेत बुझ्नुपर्ने सुझाव दिए । बानियाँले महंगी, भ्रष्टाचार, हत्या, हिंसा, आतंक बढ्दो क्रममा हरेको भन्दै त्यसको विरोध गर्न विद्यार्थी अगाडी आउन निर्देशन समेत दिए ।
 निर्वाचनको समयमा जनतालाई दिएको प्रतिबद्धताहरु पूरा गर्नु भन्दा अझै झुटको खेति गर्न कम्युनिष्ट नेताहरु तल्लीन रहेको बानियाँको आरोप छ । 
कार्यक्रमकाबीच नेवि संघ वन संकायका संस्थापक सभापति मनोज बुर्लाकोटी, निवर्तमान सभापति प्रकाश तिवारीलाई सम्मान गरिएको थियो । 
नेविसंघ वन संकायका सभापति मोहन मिश्रको अध्यक्षतामा भएको कार्यक्रममा कांग्रेस जिल्ला उपसभापति बिष्णुप्रसाद लामिछाने, निवर्तमान सभापति रघुरमण न्यौयाने, प्रवक्ता प्रदीप कोइराला, नेतृ रीता खनाल, वन विज्ञान संकाय सभापति ललितजंग खड्का, कार्यबाहक स्ववियु सभापति सुदिप भट्टराईलगायतको उपस्थिति रहेको थियो ।