खनिज बस्तुहरुको प्रवर्धनका लागी विशेष ध्यान दिईनेः प्रधानमन्त्री 

३ जेष्ठ, हेटौँडा । प्रधानमन्त्री केपी शर्मा ओलीले खनिज तथा खनिजजन्य बस्तुहरुको अन्वेषण, उत्खनन्, प्रशोधन र बजारीकरणका लागि आवश्यक बजेटको व्यवस्था गर्ने प्रतिवद्धता जनाएका छन् ।
शुक्रबारबाट काठमाडौंको लैनचौरस्थित खानी तथा भूगर्भ विभागमा आयोजित ‘नेपाल अन्तराष्ट्रिय जेम एण्ड ज्वेलरी एक्स्पो’को उद्घाटन गर्दै प्रधानमन्त्री ओलीले नेपालमा सुन, फलाम र तामाखानीलाई आधुनिकीकरणको माध्यामबाट उत्खनन् गरी मुलुकको निर्यात व्यापारमा सुधार ल्याउने योजना रहेको बताए ।
उनले सरकारले आगामी आर्थिक वर्षको नीति तथा कार्यक्रममार्फत् नै खनिज तथा खनिजजन्य बस्तुहरुको पर्याप्त निर्यात हुने गरी खोज, अन्वेषण, उत्खनन्, प्रशोधन र बजारीकरणका लागि आवश्यक व्यवस्था गर्ने प्रतिवद्धता जनाए ।
नेपालको निर्यात व्यापारमा महत्वपूर्ण योगदान दिन सक्ने खनिज तथा खनिजजन्य बस्तुहरुको उत्खनन्, प्रशोधन र बजारीकरणलाई सरकारले प्राथमिकता दिएको प्रधानमन्त्री ओलीको भनाई छ । 
नेपाल सुनचाँदी रत्न तथा आभुषण महासंघ र खानी तथा भूगर्भ विभागको संयुक्त आयोजनामा आयोजना गरिएको ३ दिने सो एक्स्पोमा नेपाली गरगहनाको मौलिकता, विविधता र विशिष्टता झल्कने खालका प्रर्दशनीहरु राखिएका छन ।