करको दर नबढाउन सुझाव, आर्थिक विधेयक पारित

१२ असार, हेटौँडा । ३ नम्बर प्रदेशसभाबाट प्रदेश सरकारको अर्थ सम्बन्धी प्रस्तावलाई कार्यान्वयन गर्न बनेको विधेयक सर्वसम्मत पारित भएको छ । विधेयकमाथिको छलफलमा भाग लिंदै प्रदेशसभा सदस्यहरुले करलाई प्रोत्साहन हुने ढंगले करको दर निर्धारण गर्नुपर्ने बताएका थिए । 
सांसद पुकार महर्जनले कृषि क्षेत्रमा लगाईएको करको विरोध गर्दै मौसममा निर्भर कृषि क्षेत्रमा कर नलगाउन सुझाव दिए । सांसद नरोत्तम बैद्यले सिमेन्टमा प्रति बोरा १ रुपैँया कर लगाउन सुझाव दिंदै यो रकम ब्लड बैंकलाई उपलव्ध गराई रगत लिन जाँदा ब्लड बैंकले निःशुल्क रगत उपलव्ध गराउने वातावरण बनाउन आग्रह गरे । उनले पशुपतिनाथको मन्दिर दर्शनमा जाने विदेशी पर्यटकलाई कर लगाई प्रदेशमा सामाजिक हितमा खर्च गर्न सुझाव दिए । सांसद प्रभात तामाङले सवारी प्रदेशमा दर्ता हुने भएकाले करमा पनि प्रदेशको मात्रै अधिकार हुनुपर्ने र सवारीको कर महंगो भएको धारणा राखेका थिए ।
सांसद सिर्जना शैज्युले करको दर हैन दायरा बढाउँछौं भनेर प्रतिवद्धता व्यक्त गरेपनि सरकारले पुनः कर बढाएको भन्दै आपत्ति जनाईन् । सांसद रिना गुरुङले मध्यम बर्गलाई हेरेर कर ल्याउनुपर्नेतर्फ सचेत गराएकी थिईन् ।
विधेयकमाथि उठेका प्रश्नहरुको जवाफ दिंदै आर्थिक मामिला तथा योजना मन्त्री कैलाशप्रसाद ढुंगेलले सुझाव सकारात्मक भएको बताए । उनले करको दर नबढाएको जानकारी दिंदै कर संकलनको अवस्थामा सुधार गर्ने बताए । उनले चालु आर्थिक बर्षमा कर्मचारीको अभाव र ज्ञानको अभावले लक्ष्य अनुसार कर संकलन गर्न नसकिएको स्विकारेका थिए ।
बैठक अर्को सूचना नभएसम्मका लागि स्थगित भएको छ ।