भ्याटमा जान सकिन्नः यातायात व्यवसायी

१५ असार, हेटौँडा । सरकाले ढुवानीको भाडामा मूल्य अभिबृद्धि कर (भ्याट) लाग्ने व्यवस्था गरेपछि यातायात व्यवसायीहरुले आफुहरु समस्यामा परेका बताएका छन् । यातायात व्यवसायीले गर्ने ढुवानी भाडामा १३ प्रतिशत भ्याट लाग्ने सरकारको नीतिगत निर्णय अव्यवहारिक रहेको उनीहरुको गुनासो छ ।
शनिबार हेटौंडामा भएको व्यवसायीहरुको भेलामा ई–लकिङ ढुवानी व्यवस्था, ढुवानी भाडामा भ्याट, करको नयाँ व्यवस्था, भारतीय सवारी साधनको अतिक्रमण, दुर्घटना आदि कारणले यातायात व्यवसायी व्यवसायबाट पलायन हुने खतरा बढेको उनीहरुले बताएका छन् ।
नारायणी यातायात व्यवसायी संघका अध्यक्ष हीरालाल श्रेष्ठको सभाध्यक्षतामा भएको भेलामा व्यवसायीहरुले ढुवानी व्यवसायमा गरिएको लगानीको सुरक्षणको माग समेत गरेका छन् । 
कार्यक्रममा संघका अध्यक्ष रहेका श्रेष्ठले ७० प्रतिशत ढुवानी व्यवसायी स्वरोजगार मजदुर रहेका कारण ढुवानी भाडामा भ्याट लगाउँदा पेशागत जटिलता सृजना हुने बताए । 
संघका पूर्बअध्यक्ष बद्रीपसाद चौलागाईले सरकारले गरेको नयाँ व्यवस्थाले भारतीय ट्रकहरुले नेपालमा मालसामान ढुवानी गर्ने वातावरण सहज गरेको तर, नेपाली व्यवसायीलाई अप्ठयारोमा पारेको बताए ।
यस्तै सार्बजनिक सवारी व्यवसायमा निजी क्षेत्रले गरेको अर्बौ रुपैयाँको लगानी जोखिममा परेको संघका महासचिव सरोज खनालले बताए । मालसामान ढुवानी गर्ने मौजुदा साधनले हालको अवस्थामा एक तिहाई मात्र काम गरिरहेको खनालको भनाई छ । 
बर्तमान सरकारले गरेको व्यवस्था अनुसार सवारी साधनले बैंक व्याज तिर्न पनि नसकेर व्यवसाय नै संकटमा परिरहेको व्यवसायीहरुको गुनासो छ ।