सिएसआई नेपाल तीनदिनदेखि ठप्प

३ पुस, हेटौँडा । हेटौँडा औद्योगिक क्षेत्रमा रहेको बहुराष्ट्रिय कम्पनी क्लोजर सिष्टम्स इन्टरनेशनल नेपाल सिएसआई तीन दिनेदेखि ठप्प भएको छ । मजदुर आन्दोलनका कारण उद्योग तीन दिनदेखि ठप्प भएको हो ।

उद्योगका १७ जना मजदुर तलव भत्ता र उपदान बृद्धि, समान यातायात सुविधा लगायतका माग राख्दै आन्दोलनमा उत्रिएका छन् । ५ महिनादेखि उद्योग व्यवस्थापनसँग पटक पटक भएको छलफलमा सहमति नजुटेपछि धर्ना थालिएको नेपाल कारखाना श्रमिक संघ सिएसआई इकाई अध्यक्ष किशोर पोखरेलले बताए । उनीहरुका अनुसार श्रम कार्यालय हेटौँडामा भएको छलफलमा पनि सहमति नजुटेपछि हड्तालका लागि उद्योगमा निर्वाचन भएको थियो । निर्वाचनमा हड्तालमा जाने निर्णयपछि मंसिर १ गते उद्योगलाई जानकारी दिईएको थियो । एक महिनाभित्र पनि सहमति नजुटेपछि आन्दोलन थालेको पोखरेलको भनाई छ ।

नाकाबन्दी र भुकम्पका कारण महंगी बढेपछि सेवा सुविधा बृद्धि नभएको मजदुरहरुले बताए । उद्योग नाफामा रहेपनि सेवासुविधा बृद्धिमा भने व्यवस्थापनले वेवास्ता गरेको उनीहरुको भनाई छ । उद्योगले दैनिक तीन सिफ्टमा २० लाख विर्को उत्पादन गर्ने गरेको छ । उद्योगको उत्पादन बढि भारतमा केही नेपालमा खपत हुने गरेको छ । उद्योगले पेप्सी र कोकाकोलाको बिर्को उत्पादन गर्ने गरेको छ ।