बानियाँद्वारा कामधेनु सहकारीको भवन उद्घाटन

३१ असार, हेटौँडा । हेटौँडा–६ चुच्चेखोलामा रहेको कामधेनु बहुद्देश्यीय सहकारी संस्थाको नवनिर्मित भवनको मंगलबार उद्घाटन गरिएको छ । प्रदेशसभा सदस्य एवं ३ नम्बर प्रदेश प्रमुख प्रतिपक्ष दल (नेपाली कांग्रेस) का नेता ईन्द्रबहादुर बानियाँले भवन उद्घाटन गरेका हुन् ।
कार्यक्रममा बोल्दै नेता बानियाँले चुनावको बेलामा आफ्नो दलको झण्डा बोकेपनि विकासमा सबै एक भएर अघि बढ्नुपर्नेमा जोड दिए । उनले विकासमा आफुले कहिले पनि पक्ष विपक्षको दृष्टिकोणले नहेर्ने बताए । आफुले विकासमा सबैसंग सहकार्य गरिरहेको र अगामी दिनमा पनि गर्ने भन्दै सहकारीको मूल उद्धेश्य नै सहकार्य रहेको बताए । कार्यक्रममा भवन निर्माणको क्रममा सहयोग गर्ने नेता बानियाँसहित दाताहरुलाई सम्मान समेत गरिएको थियो । 
कार्यक्रममा हेटौँडा वडा नम्बर ६ का अध्यक्ष अर्जुनप्रसाद चौलागाई, हेटौँडा वडा नम्बर १६ का अध्यक्ष रामकृष्ण कोइराला, जिल्ला बहुद्देश्यीय सहकारी संघका अध्यक्ष रामहरी न्यौपाने, जनकल्याण बचत तथा ऋण सहकारी संस्थाका अध्यक्ष हिमाल पौडेल, कामधेनुका संस्थापक अध्यक्ष बासुदेव सापकोटा, नारी चेतना बचत तथा ऋण सहकारी संस्थाका अध्यक्ष ज्ञानु अर्याल, टोल विकास संस्था ६ नम्बर वडा समन्वय समितिका अध्यक्ष केशव धिताल, नौलो विहानी कृषि सहकारी संस्थाका उपाध्यक्ष भरत सापकोटा, कामधेनुका सल्लाहकार उदय विडारी, उपाध्यक्ष उदयप्रकाश दाहाल, व्यवस्थापक भीमसेन पौडेल लगायतले मन्तव्य व्यक्त गरेका थिए ।
संस्थाले साढे ९ धुर जग्गामा २७ लाख रुपैँयाको लागतमा एक तल्ले पक्की भवन बनाएको छ । जसमध्ये १७ लाख रुपैँया सरकारी निकाय, जनप्रतिनिधि, विभिन्न संघसंस्था, व्यक्ति र शेयर सदस्यहरुबाट आर्थिक सहयोग जुटाएको छ । भवन निर्माण भएपछि संस्थालाई आगामी दिनमा बहुद्देश्यीय काम गर्न सहज भएको संस्थाले जनाएको छ । ५ सय जना शेयर सदस्य रहेको संस्थाले २ करोड रुपैँया कारोबार गरिरहेको छ ।