सहकारी बैंक हेटौँडामा २८३ सहकारी आवद्ध

१९ साउन, हेटौडा । राष्ट्रिय सहकारी बैंक स्थापनाको अवसरमा आइतबार हेटौडामा अन्तरक्रिया कार्यक्रमको आयोजना गरिएको छ । 
राष्ट्रिय सहकारी बैकले २०६१ साल साउन १९ गतेबाट बैकिङ सेवा शुरु गरेको थियो । कार्यक्रममा राष्ट्रिय सहकारी बैंक हेटौडा शाखा प्रमुख रामेश्वर अर्यालले सहकारीका लागि विद्यमान कानून अवसर र चुनौती विषयक कार्यपत्र प्रस्तुत गरेका थिए । कार्यपत्र माथि विभिन्न सहभागीहरुले सुझाव प्रस्तुत गरेका थिए । 

राष्ट्रिय सहकारी बैंक हेटौडा शाखाका समन्वय उपसमितिका संयोजक नारायणप्रसाद देवकोटाको सभापतित्वमा कार्यक्रम भएको थियो । कार्यक्रममा राष्ट्रिय सहकारी महासंघका केन्द्रीय सदस्य बद्रीप्रसाद लम्साल, केन्द्रीय लेखा समितिका सदस्य तारा गुरुङ, मकवानपुर जिल्ला दुग्ध उत्पादक सहकारी संघका अध्यक्ष बासुदेव अधिकारी, जिल्ला बचत तथा ऋण सहकारी संघकी अध्यक्ष राधा सिन्तान, राष्ट्रिय सहकारी बैंक हेटौडाका संचालक सदस्य राजु गौतम, हेटौडा बचत तथा ऋण सहकारी संस्थाका अध्यक्ष ईन्द्रबहादुर बस्नेत, जनकल्याण बचत तथा ऋण सहकारीका अध्यक्ष हिमाल पौडेल लगायत विभिन्न सहकारी संस्थाका प्रतिनिधि, बैंकका कर्मचारी र संचाकर्मीहरुको सहभागिता रहेको थियो ।

देशभर ४४ शाखा रहेको राष्ट्रिय सहकारी बैक हेटौैडा शाखा स्थापना भएको ८ वर्ष पूरा भै ९ वर्षमा प्रवेश गरेको छ । हाल बैकमा २ सय ८३ वटा सहकारी संस्थाहरु आवद्ध रहेका छन । बैंकले गत आव ०७५/०७६ मा शेयर पूँजी २ करोड ७१ लाख र निक्षेपमा ६८ करोड ३१ लाख र ऋण लगानीमा ५५ करोड कारोवार गर्न सफल भएको वरिष्ट सहायक अप्सरा देवकोटाले बताईन । संस्थाले आगामी दिनमा थप सहकारी संस्थाहरुलाई बैंकमा आवद्ध गराउने योजना समेत सार्वजनिक गरेको छ ।