सुनको मूल्यमा नयाँ कीर्तिमान, तोलाको ६९ हजार ५ सय रुपैयाँ

२२ साउन, हेटौँडा । सुनको भाउ उकालो लाग्ने क्रमले बुधबार पनि निरन्तरता पाएको छ । बुधबार एकैदिन तोलामा १५ सय रुपैयाँले बढेर सुनको भाउँ तोलाको ६९ हजार ५ सय रुपैयाँमा पुगेको छ ।
मंगलबार ६८ हजरमा कारोबार भएको सुनको भाउँ बुधबार १५ सयले बढेर ६९ हजार ५ सय पुगेको हो । बुधबार अन्तराष्ट्रिय बजारमा सुन प्रति औँस २७ डलरले बढेको छ ।
भारत र पाकिस्तानबीच तनाव बढेर भारतीय रुपैयाँ कमजोर भएर डलर मजबुत भएपछि सुनको भाउ महँगो भएको हो । यो अवस्थाले सुनको भाउ अझै बढ्ने संकेत देखिएको महासंघ अन्तर्गत मूल्य निर्धारण समितिका संयोजक तेजरत्न शाक्यले बताए । अन्तराष्ट्रिय बजारमा सुनको भाउ प्रति औँस १५ सय डलरसम्म पुग्ने अनुमान गरिएको संयोजक शाक्यको भनाई छ ।
अहिले विश्वभरी नै अर्थतन्त्रमा समस्या बढेकाले सुनमा लगानीकर्ताको आकर्षण बढेको छ । सुनमा लगानीकर्ताको आकर्षण बढेसँगै भाउ महँगो भएको हो ।
यसैबीच भाउ महँगो भएपछि सुनको कारोबार ठप्प जस्तै भएको छ । २२ वटा वाणिज्य बैंकले आलोपालो गरेर दैनिक २० किलो सुन दिने गरेपनि भाउ महँगो भएसँगै व्यवसायी बैंकमा जान छाडेका छन् ।
चाँदीको भाउ पनि बुधबार तोलामा १५ रुपैयाँ बढेर तोलाको ८ सय १० रुपैयाँ रुपैयाँ निर्धारण गरिएको छ ।