विद्युत् प्राधिकरणको नाफा १ सय ४९ प्रतिशतले बृद्धि

२८ साउन, हेटौँडा । नेपाल विद्युत् प्राधिकरणले अघिल्लो आर्थिक बर्षको तुलनामा गत आर्थिक बर्षमा १ सय ४९ प्रतिशतले बढी नाफा कमाएको छ । 
प्राधिकरणले आर्थिक बर्ष २०७५ ÷७६ मा ७ अर्ब बढी नाफा कमाएको जनाएको छ । उर्जा जलश्रोत तथा सिंचाई मन्त्री बर्षमान पुनले मंगलबार सिंहदरबारमा पत्रकार सम्मेलनको आयोजना गरी आर्थिक बर्ष २०७५÷७६ मा प्राधिकरणले ७ अर्ब २० करोड नाफा कमाएको जानकारी दिएका हुन् । 
प्राधिकरणले आर्थिक बर्ष २०७४÷७५ मा साढे २ अर्ब नाफा कमाएको थियो । प्राधिकरणले साँवा , व्याज र रोयल्टी गरी राज्यको ढुकुटीमा १५ अर्ब ५९ करोड रुपैया जम्मा गरेको छ ।
प्राधिकरणले विद्युत् चुहावटमा पनि उल्लेख्य रुपमा कमि ल्याएको जनाएको छ । अघिल्लो बर्षको भन्दा ५ दशमलब १३ प्रतिशतले विद्युत् चुहावट घटेको मन्त्री पुनले जानकारी दिए । हाल प्राधिकरणको विद्युत् चुहावट १५ दशकमलब १३ प्रतिशत रहेको छ ।
 प्राधिकरणले गत आर्थिक बर्षमा ३ करोड ४७ लाख युनिट अर्थात् ३२ करोड रुपैयाको विद्युत् निर्यात गरेको छ । पत्रकार सम्मेलनमा उर्जा मन्त्री पुनले लामो समय देखि रुग्ण बनेको अप्पर त्रिशुली ३ ‘ए’ तथा कावेली करिडोर लगायतका उत्पादन तर्फ १, प्रशारण तर्फ ३ र वितरण तर्फ ३४ गरी ३८ वटा रुग्न आयोजनाहरु सम्पन्न भएको जानकारी दिए । 
विद्युत् चुहावटमा कमि ल्याउदै प्रभावकारी सेवा विस्तार लगायतका सुधार गर्दे अघि बढेको प्राधिकरणले भविष्यमा थप नाफा आर्जन गर्ने विश्वास मन्त्री लिएको पत्रकार सम्मेलनमा जनाएका छन् ।