गुण नियन्त्रण कार्यालय हेटौंडाले गर्यो वार्षिक समिक्षा

५ भदौ, हेटौंडा । खाद्य प्रविधि तथा गुण नियन्त्रण कार्यलय हेटौंडाले वार्षिक प्रगतीको समिक्षा गरेको छ। यसैक्रममा खाद्य प्रविधि तथा गुण नियन्त्रण कार्यलय हेटौंडामा आर्थिक वर्ष २०७५/७६मा बिभिन्न समयमा गरिएको बजार अनुगमनका क्रममा ७९ मुद्दा दायर भएको जनाएको छ।

कार्यालयले बिहिबार हेटौंडा २०७५/७६को वार्षिक प्रगती समिक्षा कार्यक्रममा र पत्रकार भेटघाटको आयोजना गर्दै यसो बताएको हो।कार्यालयकी खाद्य अनुसन्धानअधिकृत सिर्जना महर्जनले वार्षिक प्रगती प्रस्तुतीका क्रममा कार्यलयले आथिर्क वर्ष २०७५/७६ मा हेटौंडाका विभिन्न ४ सय ६५ स्थानमा अनुगमन गरेको र अनुगमनका क्रममा ७९ वटा मुद्दा दर्ता भएको तर अहिले सम्म कुनै पनि मुद्दाको फैसला नभएको बताइन।

देश प्रदेशमा विभाजन भएसँगै कार्यालयको कार्य क्षेत्र खुम्चिएर  सिन्धुली, चितवन र मकवानपुर गरी ३ जिल्लामा मात्र क्षेत्रधिकार रहेको कार्यालयले गत आर्थिक वर्षमा मकवानपुरका ३ स्थानिय तह थाहा नगरपालिका, हेटौंडा उपमहानगरपालिका र इन्द्रसरोवर गाउँपालिकाका ३ होटल, रेष्टुरेन्टलाई हरियो दुई तारा भएको लोगो प्रदान गरेको, त्यसैगरी थाहा नगरपालिका, हेटौंडा उपमहानगरपालिका र इन्द्रसरोवर गाउँपालिका मा रहेका १९ वटा होटल, रेष्टुरेन्टलाई हरियोमा एक तारा लोगो प्रदान गरेको , तिनै स्थानका १७ होटल, रेष्टुरेन्टलाई पहेंलो लोगो  र थाहानगरपालिकामा१०,हेटौंडाउपमहानगरपालिकामा १७ र इन्द्रसरोवर गाउँपालिका १२ गरी जम्मा ३९ होटल, रेष्टुरेन्टलाई बिभिन्न तहको लोगो प्रदान गरेको महर्जनले बताइन।

कार्यालयले गत आर्थिक वर्षमा २१६ पटक बजार अनुगमन,२सय ७४ पटक खाद्य उद्योगको अनुगमन, १सय ३९ पटक होटल, रेष्टुरेन्ट र मिठाई पसलको  अनुगमन, २५  पटक संयुक्त अनुगमन र १० पटक दाना उद्योगको अनुगमन गरिएको अधिकृत महर्जनले बताइन।कार्यक्रममा कार्यालयका प्रमुख सोमकान्त रिजालको, संचारकर्मीहरुको उपस्थित रहेको थियो ।