सहकारीले आर्थिक उपार्जनमा जोड दिनु पर्छ : चौलागाई

२४ भदौ, हेटौडा । हेटौंडा–६ का वडा अध्यक्ष अर्जुनप्रसाद चौलागाईले सहकारी संस्थाले आर्थिक उपार्जन र उत्पादनको क्षेत्रमा काम गर्नु पर्ने आवश्यकता औल्याएका छन् ।
हेटौडा–६ चौघडामा रहेको जनकल्याण बचत तथा ऋण सहकारी संस्थाको २४ औं वार्षिकोत्सव कार्यक्रमलाई सम्वोधन गर्दै वडा अध्यक्ष चौलागाईले सहकारी एकिकरण सबैको सहमती र आवश्यकताको आधारमा गर्नु पर्नेमा जोड दिए । नयाँ सहकारी ऐन र नियम सहकारीमा आवद्ध सदस्यहरुको हितमा रहेकोले सबै सहकारी संस्थाहरुले वुद्धिमतापूर्वक एकिकरणमा जानुको विकल्प नरहेको चौलागाईको भनाई थियो ।
कार्यक्रममा मकवानपुर जिल्ला बचत तथा ऋण सहकारी संघकी सहसचिव मीना चौरेल, संजीवनी बचत तथा ऋण सहकारीका अध्यक्ष रणबहादुर कार्की, संस्थाका संस्थापक अध्यक्ष बासुदेव अधिकारी, निवर्तमान अध्यक्ष रघुप्रसाद आचार्य, सल्लाहकार बद्रीबहादुर पाठक, संचारकर्मी भीमसेन पौडेल, टोल विकास संस्था वडा समन्वय समिति हेटौडा–६ का अध्यक्ष केशव धिताल, न्यूरेनी चिसापानी सामुदायिक वनका अध्यक्ष ज्ञान बहादुर क्षेत्री, सिर्जना टोल विकास संस्थाकी अध्यक्ष जीवकुमारी पौडेल, संस्थाका उपाध्यक्ष श्यामप्रसाद भट्टराई, सचिव मीना अधिकारी लगायतकाले मन्तव्य व्यक्त गरेका थिए । 
कार्यक्रममा संस्थाका कोषाध्यक्ष चेतनाथ खतिवडाले संस्थाको आर्थिक प्रतिवेदन प्रस्तुत गरेका थिए । संस्थामा हाल २ हजार ४ सय शेयर सदस्य, २ करोड ६ लाख ६६ हजारको शेयर पूँजी, १२ करोड २० लाख निक्षेप, १३ करोड १७ लाख ऋण लगानी र १५ करोड ७४ लाख कुल सम्पति रहेको कोषाध्यक्ष खतिवडाको प्रतिवेदनमा उल्लेख गरिएको छ ।
संस्थाले वार्षिकोत्सवको अवसरमा विशेष छुट दिई करीव २ सय भन्दा बढी शेयर सदस्य बनाएको छ भने हेटौडा हेल्थपोष्ट, चौघडालाई एक थान सर्जिकल बेड हस्तान्तरण गरेको छ । कार्यक्रम संस्थाका अध्यक्ष हिमाल पौडेलको अध्यक्षतामा भएको थियो ।