घरमै पुगेर कपास बनाउने ट्रयाक्टरलाई कारवाहीको माग

१७ कार्तिक, हेटौँडा । नेपाल कपास उद्योग तथा सिरक डसना व्यवसायी महासंघले ३ नम्बर प्रदेशका मूख्यमन्त्री डोरमणी पौडेललाई आफ्नो समस्या समाधानको माग गर्दै ज्ञापनपत्र बुझाएको छ । महासंघका अध्यक्ष चन्दना कोइराला, महासचिव घनश्याम पौडेलद्वारा हस्ताक्षरित ज्ञापतपत्रमा यस्तो माग गरिएको हो 
महासंघले कृषि कार्य गर्ने भन्दै भन्सार छुट लिएर ल्याएका ट्रयाक्टरमा कपास बनाउने मेसिन जोडेर दुरुपयोग गरेको बताईएको छ । ज्ञापन पत्रमा यस्ता ट्रयाक्टरका कारण ३ नम्बर प्रदेशका करिव १५ सय उद्योग व्यवसायी मारमा परेको भन्दै यस्तो कार्यमा प्रयोग भएका ट्रयाक्टरलाई कृषि कार्यमै लगाउन माग गरिएको छ । त्यस्ता ट्रयाक्टरका कारण लघु तथा मझौला उद्योगी तथा व्यवसायीले कामबाट हात झिक्नुपर्ने अवस्था भएको भन्दै त्यस्ता ट्रयाक्टरलाई हटाई निर्धारित काम (कृषि) मा लगाउन महासंघले माग गरेको छ । उद्धेश्य विपरित कार्य गर्ने त्यस्ता ट्रयाक्टरलाई औद्योगिक व्यवसाय ऐन २०७५ अनुसार कारवाही गर्न समेत माग गरिएको छ ।
ज्ञापनपत्रमा सरकारले ल्याउन लागेको भनिएको घुम्ती उद्योग संचालन सम्बन्धी विधेयकले अहिले संचालनमा रहेका उद्योगहरुको प्रतिकुल हुने भएकाले सरोकारावालाहरुसंग छलफल र अध्ययनपछि मात्रै अघि बढाउन माग गरिएको छ । मझौला तथा घरेलु उद्योगहरुको विकास एवं प्रवद्र्धनका लागि आवश्यक नीति तथा कार्यक्रम ल्याउन समेत माग गरिएको छ । 
देशभरका २२ हजार यस्ता उद्योगमा ३५ हजार व्यवसायीको १० अर्बको लगानी रहेको र २ लाखले रोजगारी पाएको महासंघले जनाएको छ ।