जिल्ला तथा नगर उद्योग बाणिज्य संघको अन्तरक्रिया सम्पन्न

८ चैत, हेटौंडा । नेपाल उद्योग बाणिज्य संघ अन्तरगत ३ नम्बर प्रदेश अन्तर्गतका जिल्ला तथा नगर उद्योग वाणिज्य संघका अध्यक्षहरुको अन्तरक्रिया हेटौँडामा कार्यक्रम सम्पन्न भएको छ । मकवानपुर उद्योग वाणिज्य संघको समन्वयमा कार्यक्रम भएको हो । 

नेपाल उद्योग वाणिज्य महासंघका अध्यक्ष पशुपति मुरारकाको प्रमुख आतिथ्यता एवं ३ नम्बर तदर्थ समितिका संयोजक अरुणराज सुमार्गीको अध्यक्षतामा कार्यक्रम भएको थियो । कार्यक्रममा महासंघका पूर्व अध्यक्ष चण्डीराज ढकालले राज्यको संरचनामा आएको परिवर्तनलाई आत्मसात गर्न महासंघले पनि आफ्नो विधानमा प्रादेशिक संरचना अनुसारको संगठन निर्माणमा लागि परेको बताए ।

आसन्न महासंघको निर्वाचनमा आफूलाई बरिष्ठ उपाध्यक्षको उम्मेदवार घोषणा गरेका महासंघका उपाध्यक्ष शेखर गोल्छाले बैंकहरुले आर्थिक रुपमा दुर्घटना निम्त्याएको बताए । मकवानपुर उद्योग वाणिज्य संघका अध्यक्ष राजकुमार न्यौपानेले महासंघको आसन्न महासंघमा जिल्ला नगरको तर्फबाट आफूले पनि सदस्य पदका लागि उम्मेदवारी दिएकोले आफूलाई सबैले साथ र समर्थन दिन आग्रह गरे । 

प्रादेशिक संरचना अनुसार ३ नम्बर प्रदेश भित्रका १३ वटा जिल्लामा नगर र जिल्ला गरी १६ बटा उद्योग वाणिज्य संघहरु रहेका छन् । महासंघको पदाधिकारी हुनका लागि कुनै पनि राजनीतिक दलको सदस्य नभएको हुनुपर्ने महासंघको परिवर्तित विधानमा व्यवस्था गरेको छ । कार्यक्रममा महासंघका पदाधिकारी, विभिन्न उद्योग वाणिज्य संघका अध्यक्ष तथा पदाधिकारी, मउवासंघका पदाधिकारी तथा सदस्य लगायतको उपस्थिति रहेको थियो ।