एक घण्टामै स्तनपान गराए शिशु मृत्युदर घट्ने

१७ साउन, हेटौँडा । शिशु जन्मिएको एक घण्टाभित्र स्तनपान गराए शिशु मृत्युदरमा रोकथाम हुने स्वास्थ्यकर्मीहरुले बताएका छन् । विश्व स्तनपान सप्ताहको अवसरमा जिल्ला स्वास्थ्य कार्यालय मकवानपुरले सोमबार गरेको अन्तरक्रिया कार्यक्रममा स्वास्थ्यकर्मीहरुले यस्तो जानकारी दिएका हुन् । 
कार्यालयकी पव्लिक हेल्थ नर्स मिलन घिमिरेले शिशु जन्मिएको एक घण्टाभित्र स्तनपान गराए शिशु मृत्युदर २२ प्रतिशतले रोकथाम बताईन् । उनका अनुसार ५४ प्रतिशत शिशुको जन्मिएको एक महिनाभित्र मृत्यु हुने गर्दछ र एक घण्टामा स्तनपान गराए यो मृत्युदर २२ प्रतिशतले रोकथाम हुन्छ । बच्चालाई जन्मिएको ६ महिनासम्म आमाको दूधमात्रै खुवाउनुपर्ने र ६ महिनापछि पोषिलो खानेकुरासँगै २ बर्ष वा बढिसमय दूध खुवाउनाले बच्चा स्वस्थ हुने उनको भनाई छ ।
पछिल्लो तथ्यांक अनुसार मकवानपुरमा सुत्केरी आमामध्ये २ हजार ९ सय ८१ जनाले ६ महिनासम्म बच्चालाई आफ्नो दुध खुवाउने गरेको स्वास्थ्य कार्यालयको तथ्यांक छ । मकवानपुरमा आव ०७२÷०७३ मा ४ हजार ६ सय ३० जनाले दक्ष स्वास्थ्यकर्मीबाट प्रसुति सेवा लिएका छन् । 
समाजमा रहेको स्तनपानबारेको भ्रम हटाउन अगष्ट १ देखि ७ अर्थात साउन १७ देखि २३ गतेसम्म स्तनपान सप्ताह मनाउने गरिन्छ । अन्तरक्रिया कार्यक्रममा स्वास्थ्य निरीक्षक भीमसागर गुरागाई र भोला चौलागाई, तथ्यांक अधिकृत सुरेश यादव लगायतले सहजिकरण गरेका थिए ।