बकैया गाउँपालिका माघ २९ गते बालमैत्री घोषणा हुने, तयारी पुरा

२४ माघ, हेटौंडा । मकवानपुरको पुर्वी क्षेत्रमा पर्ने बकैया गाउँपालिका बालमैत्री गाउँपालिका घोषणा हुनृ भएको छ । गाउँपालिकालाई माघ २९ गते एक समारोहकाबीच बालमैत्री घोषणा गरिने भएको हो ।

शनिबार गाउँपालिकाको कार्यालयमा पत्रकार सम्मेलनको आयोजना गर्दै माघ २९ गते बालमैत्री घोषणा गरिने र त्यसको तयारी पुरा भएको गाउँपालिकाले जनाएको छ। 

बालमैत्री स्थानीय शासनका ३९ वटा सुचकहरु मध्ये १९ वटामा सत प्रतिशत र २० वटा सुचकहरुमा ९८ प्रतिशत सफलता प्राप्त गरेकोले गाउँपालिकालाई बालमैत्री घोषणा गरिन लागिएको गाउँपालिकाका अध्यक्ष दामोदर खनालले बताएका छन् । उनले घोषणा कार्यक्रमलाई सफल पार्न विभिन्न समिति र उप-समिति गठन गरिएको बताए । 

'बालमैत्री गाउँपालिका घोषणाका लागि २०७४ साल पुस १७ गते सामुहिक प्रतिबद्धता जनाई  विभिन्न क्रियाकलाप गरिएको छ । सोही अनुरुप माघ २९ गते गाउँपालिकालाई बालमैत्री घोषणा गरिन लागिएको हो'-गाउँपालिका अध्यक्ष खनालले भने ।  

त्यसैगरी पत्रकार सम्मेलनमा गाउँपालिका उपाध्यक्ष सरला बोलखेले गाउँपालिकाकाले बालमैत्री स्थानीय तह घोषणा गर्न अघिल्लो वर्ष ५० लाख र यस वर्ष ८० लाख रुपैया बजेट छुट्याएको बताइन् । उनले हाल अभियानका लागि १३ जना सहजकर्ताहरु कार्यरत रहेको बताइन् । 

माघ २९ गते बालमैत्री घोषणा भएसँगै मकवानपुरको बकैया  दोस्रो बालमैत्री गाउँपालिका बन्ने छ । यसअघि मकवानपुरको पश्चिम क्षेत्रमा रहेको मनहरी गाउँपालिका जिल्लाको पहिलो  बालमैत्री गाउँपालिकाको रुपमा घोषण भइसकेको छ ।