पर्यटक गन्तव्य बन्दै ‘पेङ्गोलिन पार्क’

रुपेश दुलाल

२२ साउन, हेटौँडा । हेटौँडा–१७ मा निर्माणाधिन पेङ्गोलिन पार्क अहिले पर्यटकको गन्तव्य बन्दै गएको छ । करिव ३ महिना अघिदेखि काम थालिएको पार्कमा अहिले स्थानीय पर्यटक आउन थालेका हुन् । 
चुच्चेखोला सामुदायिक वन समूहको क्षेत्रमा शिखरकटेरी जाने कान्तिलोकपथ सडकमा पार्क निर्माण भईरहेको छ । पार्क निर्माणमा जिल्ला वन कार्यालय मकवानपुरको १३ लाख रुपैँया, वन समूहको ४ लाख रुपैंया, बायो इन्जिनियरिङ बृक्षरोपणका लागि भू–संरक्षण कार्यालय मकवानपुरबाट १ लाख ५० हजार रुपैँयाको सहयोग रहेको छ । पहिलो चरणमा बगैंचा, विश्रामस्थल, प्लाष्टिकको पानी पोखरी, वनदेवीको मन्दिर, कार्यालय घर लगायतका काम भईसकेको समूहका कार्यालय सचिव केदार गौतमले बताए । ‘छोटो समयमा धेरै काम थालिएको छ, केही सम्पन्न भईसकेका छन् भने केही भईरहेका छन्’–उनले भने । 
समूहले पर्यापर्यटनको माध्यमबाट दिगो आयआर्जनका लागि पार्कको अवधारणा अघि सारेको जनाईएको छ । वन समूहले २ करोड ७९ लाख रुपैँयाको लागतमा तत्कालिन एवं दिर्घकालिन कार्ययोजनासहित काम गरिरहेको समूहका अध्यक्ष अर्जुनप्रसाद दाहालको भनाई छ । १७ विगाह क्षेत्रफलमा पर्यटन प्रवद्र्धनका लागि केबुल कार, आकाशे पुल, पौडी पोखरी, खेल मैदान, बुद्ध मूर्ति, दक्षिणकाली मन्दिर, भ्यू–टावर लगायतका अवधारणा अघि सारेको उनको भनाई छ । 
धरान–चतरा, कान्तिलोकपथ लगायतका पूर्वाधारको विकास यसैक्षेत्रमा भईरहेकाले काठमाण्डौं जाने र फर्कर्ने यात्रुसहित आन्तरिक एवं बाह्य पर्यटकलाई आकर्षण गर्ने लक्ष्य समूहले राखेको छ । मकवानपुरगढीको प्रवेशद्वारमै बृहद पर्यटकिय क्षेत्रको अवधारणा अघि बढाईएको दाहालको भनाई छ । पार्कको निर्माणमा स्थानीय रामचन्द्र सापकोटासहित उपभोक्ता, कालिगढ लगायतको सहभागिता रहेको छ ।