मुख्यमन्त्री बानियाँले गरे बकैयाको नवनिर्मित भवनको उद्घाटन

१० मंसिर,हेटौँडा । मकवानपुरको पुर्वी क्षेत्रमा रहेको बकैया गाउँपालिकाको प्रशासनिक भवनको उद्घाटन गरिएको छ। गाउँपालिकाको प्रशासनिक भवनको बुधबार एक समारोहका बिच बागमती प्रदेशका मुख्यमन्त्री इन्द्रबहादुर बानियाँले उद्घाटन गरको हुन् । 

उद्घाटन कार्यक्रमलाई सम्बोधन गर्दै मुख्यमन्त्री बानियाँले दोस्रो जनआनदोलनबाट प्राप्त लोकतन्त्रले  नागरिकलाई सही प्रतिनिधि चयन गर्न स्वतन्त्रता प्रदान गरेको छ । उनले लोकतन्त्र, संघीयता र समावेशी गणतन्त्रले देशका भूगोल, समुदाय र वर्गलाई न्याय दिलाउने संरचना निर्माण गरेको उल्लेख गर्दै वर्तमान व्यवस्थाप्रति असन्तुष्ट भएकाहरू अझै सक्रिय रहे पनि यस्तो सोच टिकाउ नहुने बताएका छन् । 

गाउँपालिका अध्यक्ष धर्मराज लामिछानेको सभाध्यक्षतामा सम्पन्न उद्घाटन कार्यक्रममा बागमती प्रदेश सभा सदस्य प्रेमबहादुर पुलामी, जिल्ला समन्वय समितिका प्रमुख ललित घलान, विभिन्न राजनीतिक दलका प्रतिनिधि, १२ वटै वडाका जनप्रतिनिधि,कार्यपालिका सदस्य तथा समाजसेवी तथा स्थानीयको उल्लेख्य उपस्थिति थियो। गाउँपालिका वडा नम्बर ३ हात्तीसुंडेमा निमार्ण सम्पन्न  चार तले भव्य प्रशासनिक भवन संघीय सरकारको ६० प्रतिशत र पालिकाको ४० प्रतिशत साझेदारीमा बनेको हो ।  नवनिर्मित भवनमा अध्यक्ष–उपाध्यक्ष कार्यकक्षसहित २८ कोठा, २ सभा हल, सेवाग्राही कक्ष, भान्सा कोठा, स्टोर र शौचालय रहेको छ ।  २०७९ जेठ ३१ गते सम्झौता भई २०८१ असार १५ भित्र निर्माण सम्पन्न गर्ने लक्ष्य राखिएको भए पनि समय थपेर गत भदौ ३१ गते मात्र निर्माण सम्पन्न भएको हो। प्रारम्भिक सम्झौताअनुसार भवन निर्माण लागत ७ करोड ८२ लाख ५० हजार ७७० रुपैयाँ तय गरिएको थियो भने काम थपिएसँगै कुल लागत ७ करोड ९५ लाख ६७ हजार ९१७ रुपैयाँ पुगेको थियो ।