जोगियो कर्णालीका शाहीको सरकार, एमालेका ४ सांसदले गरे ‘फ्लोर क्रस’

google

३ बैशाख, हेटौंडा । नेकपा एमालेका चारजना सांसदले  ‘फ्लोर क्रस’ गर्दा कर्णाली प्रदेशका मुख्यमन्त्री महेन्द्रबहादुर शाहीको सरकार जोगिएको छ ।
पार्टीको ह्वीप उल्लंघन गर्दै नेकपा एमालेको माधवकुमार नेपाल पक्षीय सांसद्हरू प्रकाश ज्वाला, कुर्मराज शाही, नन्दसिंह बुढा र अम्बरबहादुर थापाले ‘फ्लोर क्रस’ गर्दै मुख्यमन्त्री शाहीको सरकार जोगाएका हुन् ।
३९ जना सांसद रहेको कर्णाली प्रदेश सभामा विश्वासको मत लिएका मुख्यमन्त्री शाहीले एमाले माधव पक्षका ४ सहित २२ मत प्राप्त भएको थियो । 
प्रदेश सभामा मुख्यमन्त्री शाहीको दल नेकपा माओवादी केन्द्रका १२ जना मात्र सांसद छन् । यस्तै ६ जना सांसद रहेको नेपाली कांग्रेसले पनि मुख्यमन्त्री शाहीलाई विश्वासको मत दिएको छ । एक सदस्य रहेको राप्रपा भने तटस्थ रह्यो ।
एमालेका प्रकाश ज्वाला, कुर्मराज शाही, नन्दसिंह बुढा र अम्बरबहादुर थापाले ’फ्लोर क्रस’ गरेर माओवादी केन्द्रका मुख्यमन्त्री शाहीको पक्षमा मतदान गरेका हुन् ।    
केही दिन अघिसम्म प्रकाश ज्वाला र नन्दसिंह बुढा कर्णाली प्रदेशका मन्त्री थिए । पार्टीले समर्थन फिर्ता लिएको लामो समयम्म पनि सरकारमा रहेका यी दुई मन्त्रीले केही दिन अघि मात्र राजीनामा दिएका थिए । कर्णालीमा माधव नेपाल पक्षका ९ सांसद छन् ।