बाँस्कोटालाई लेखा समितिबाट फिर्ता गर्न ट्रान्सपरेन्सीको माग

google

४ बैशाख, हेटौंडा । भ्रष्टाचारविरुद्धको अन्तर्राष्ट्रिय संस्था ट्रान्सपरेन्सी इन्टरनेसनलले सेक्युरिटी प्रेस खरिद प्रकरणमा मुछिएका सांसद गोकुल बाँस्कोटालाई सार्वजनिक लेखा समितिको सदस्य तोकिएकोमा आपत्ति जनाएको छ । 
ट्रान्सपरेन्सीले भ्रष्टाचारमामा नाम मुछिएका व्यक्तीलाई सदस्य तोकिएको भन्दै तत्काल फिर्ता गर्न माग समेत गरेको छ । बाँस्कोटा सञ्चारमन्त्री रहेका बेला सेक्युरिटी प्रेस खरिद प्रकृयामा ७० करोड रुपैयाँ घूस मागेको ‘अडियो टेप’ सर्वाजनिक भएको थियो । 
‘अडियो टेप’ सर्वाजनिक प्रकरणको छिनोफानो नहुँदै लेखा समितिको सदस्य तोकिनु भ्रष्टाचारविरुद्ध प्रधानमन्त्री केपी शर्मा ओलीको ‘शून्य सहनशील’ नीतिको विरुद्ध भएको जिकीर गर्दै ट्रान्सपरेन्सीले बास्कोटालाई फिर्ता गर्न माग गरेको जनाएको छ । बाँस्कोटालाई लेखा समितिकै सदस्य बनाएपछि यो प्रकरणमा पदीय प्रभाव पर्ने निश्चित भएकाले बाँस्कोटालाई लेखा समितिमा पठाइनु अनुचित भएको ट्रान्सपरेन्सीले निश्कर्ष निकालेको छ ।
सत्तारुढ दल नेपाल कम्युनिष्ट पार्टी (एमाले) संसदीय दलको सिफारिसमा केही दिनअघि सभामुखले बाँस्कोटालाई लेखा समितिमा पठाएको जानकारी प्रतिनिधि सभा बैठकमा गराएका थिए ।