बागमती प्रदेशमा एक बर्षमा २०३ प्रहरी कारवाहीमा, ६५१ पुरस्कृत

१० बैशाख, हेटौंडा । बागमती प्रदेश प्रहरी कार्यालयले पछिल्लो एक बर्षमा २ सय ३ प्रहरी कर्मचारीलाई कारवाही गरेको जनाएको छ । 
प्रहरी आचारण विपरित काम गर्ने २ सय ३ प्रहरी कर्मचारीलाई कारवाही गरेको शुक्रबार कार्यालयमा आयोजित पत्रकार सम्मेलनमा प्रहरी नायव महानिरीक्षक (डिआइजी) बसन्तकुमार लामाले जानकारी दिएका हुन् । उनले चालु आर्थिक बर्ष २०७७ बैशाखदेखि चैतसम्ममा प्रदेश मातहतका विभिन्न प्रहरी कार्यालयमा कार्यरत २ सय ३ प्रहरीलाई कारवाही गरेको र ६ सय ५१ प्रहरीलाई कुशलता पूर्वक कार्यसम्पादन गरेकोमा सम्मान गरेको जानकारी दिए ।
उनले उत्कृष्ट प्रहरी छनौट कार्यविधि लागु गर्दै प्रत्येक महिना १६ जना प्रहरी कर्मचारीलाई पुरस्कृत गर्ने गरेको बताए । कार्यालयले प्रहरीलाई घुस दिन खोज्ने १८ सय ७० जना चालक कारवाही र ३४ लाख रुपैंया घुस रकम फिर्ता गराईएको जनाईएको छ । यस बर्ष ८३३ विगाह गाँजा खेति र १०३ बिगाह अफिम खेति नष्ट गरेको पत्रकार सम्मेलनमा जानकारी दिईएको थियो ।
कार्यालयले प्रदेशका विभिन्न नाकाका २२ स्थानमा सिसिटिभि क्यामारा जना गरेको र प्रहरी दर्पण टेलिभिजन कार्यक्रम संचालन गरिरहेको जनाईएको छ । भौतिक पूर्वाधारतर्फ यसबर्ष २ ईलाका, एक जिल्ला ट्राफिक, ८ प्रहरी चौकीका लागि निःशुल्क जग्गा प्राप्त गरेको र चालु आर्थिक वर्षमा ४८ वटा प्रहरी कार्यालय निर्माण सम्पन्न भएको र २१ वटा प्रहरी कार्यालय निर्माणधिन रहेको जानकारी दिईएको थियो ।
२९ करोडको लगानीमा १०५ कोठा अत्याधुनिक प्रदेश प्रहरी कार्यालयको इ-विडिङ प्रकृया भइसकेको र छिटै निर्माण प्रकृया शुरु हुने बताउँदै डिआईजी लामाले हेटौंडा–१५ रातोमाटेमा चेकपोइन्ट निर्माणका लागि १४ करोड लागत रहेको र २ करोड स्वीकृत भईसकेको जानकारी दिए । उनले यो बर्ष प्रदेश सरकारले प्रदेश प्रहरी कार्यालयलाई १ अर्ब १२ करोड भौतिक पूर्वाधारका लागि विनियोजन गरेको जानकारी दिए ।
नुवाकोट र काभ्रेमा प्रहरी गोदाम घरका लागि १ करोड विनियोजन भएको, २२ थान मोटरसाइकल र १२ थान गाडी खरिद प्रकृयाका लागि प्रदेश सरकारको ४ करोड लगानीमा खरिद प्रकृया अघि बढेको जनाईएको छ ।