राष्ट्रियसभा उपनिर्वाचनको मतदान हेटौंडामा हुने, ५ दल सहभागी हुने

१६ बैशाख, काठमाडौँ । राष्ट्रियसभाको रिक्त सदस्य पदका लागि हुन लागेको उपचुनावमा पाँच दलले भाग लिने भएका छन् ।  निर्वाचन आयोगले निर्वाचनमा भाग लिनका लागि निवेदन दिन जारी गरेको सूचना अनुसार ५ दलले निवेदन दिएका हुन् । 
निवेदन दिनेमा नेकपा एमाले, नेपाली कांग्रेस, नेकपा माओवादी केन्द्र, राप्रपा र नेमकिपा रहेको को आयोगका प्रवक्ता राजकुमार श्रेष्ठले जानकारी दिए । निवेदन दिएका दलको नामावली राजपत्रमा प्रकाशित गर्ने बिहीबार बसेको आयोगको बैठकले निर्णय गरेको छ । आयोगका अनुसार एमालेको सूर्य चिन्ह र मतपत्रमा क्रम संख्या १, कांग्रेसको रुख र क्रम संख्या २, माओवादी केन्द्रको गोलाकार भित्र हँसिया हथौडा र क्रम संख्या ३, राष्ट्रिय प्रजातन्त्र पार्टी हलो र क्रम संख्या ४ र नेमकिपालाई मादल र क्रम संख्या ५ रहनेछ ।
माओवादी केन्द्रबाट निर्वाचित रामबहादुर थापा बादल एमालेमा गएसंगै पार्टीले कारबाही गरेपछि एक पद रिक्त भएको थियो । निर्वाचन जेठ ६ गते बागमती प्रदेश राजधानी हेटौँडामा हुने र मतदानमा बागमती प्रदेशका प्रदेशसभासभा सदस्य ११० जना र गाउँपालिकाका अध्यक्ष, उपाध्यक्ष तथा नगरपालिकाका प्रमुख, उपप्रमुख दुई सय ३८ जना गरी तीन सय ४८ जना मतदाता रहेका छन् ।
आयोगले मतदालतको अन्तिम नामावली वैशाख २१ गते सार्वजनिक गर्ने तयारी गरेको छ । निर्वाचनमा प्रदेशसभा सदस्यको मतभार ४८ र स्थानीय तहका पदाधिकारीको १८ गणना हुनेछ ।