प्रधानमन्त्रीबाट संविधानको हत्या गर्ने काम भएको छ, रक्षाका लागि उम्मेदवारी: देवकोटा

२४ बैशाख, हेटौंडा । राष्ट्रियसभा सदस्यमा उम्मेदवारी दिएका डा. खिमलाल देवकोटाले प्रधानमन्त्रीबाट संविधानको हत्या गर्ने काम भएकोले संविधानको रक्षाका लागि आफुले उम्मेदवारी दिएको बताएका छन् । 
स्वतन्त्र उम्मेदवार उनले अहिलेको व्यवस्था ल्याउन र संविधान ल्याउन ठूलो त्याग भएको बताउँदै उनले संविधान र व्यवस्थामाथि प्रहार भएकाले संविधान रक्षाका लागि आफुले उम्मेदवारी दर्ता गराएको बताए । उनले सरकारले प्रदेश र स्थानीय तहलाई हात खुट्टा बाँधेर काम गर्ने वातावरण नदिईएको बताए । उनले समानुपातिक र समावेशी प्रतिनिधित्व जस्तो साझा उपलव्धीलाई भताभुङ गर्ने काम वर्तमान सरकारबाट भईरहेको बताए । उनले राजनैतिक दलबाट सहयोग र समर्थन आफुलाई रहेको बताए । 
उनले सिंहदरवारको अधिकारलाई गाउँतहसम्म पुर्याउन सहभागितामुलक प्रतिनिधित्वमा आफुले जोड दिएको बताए । बागमती प्रदेशको नीति तथा योजना आयोगका पूर्व उपाध्याक्ष समेत रहेका उनले राष्ट्रियसभाको गरिमालाई उच्च राख्ने र प्रदेश एवं स्थानीय तहको समस्या राष्ट्रियसभामा राख्दै आवाज बुलन्द गराउन काम गर्ने बताए । 
स्वतन्त्र उम्मेदवारी दिएपनि देवकोटालाई नेपाली कांग्रेस, नेकपा माओवादी केन्द्र, जनता समाजवादी पार्टी, नेकपा एमालेको माधव नेपाल समूहको समर्थन रहेको छ ।