राष्ट्रियसभा सदस्यका लागि ३ जनाको उम्मेदवारी दर्ता

२४ बैशाख, हेटौंडा । राष्ट्रियसभाको रिक्त एक सदस्य पदका लागि ३ जनाको उम्मेदवारी दर्ता भएको छ । निर्वाचन अधिकृतको कार्यालय हेटौंडामा तोकेको समय अपरान्ह ४ बजेसम्ममा ३ जनाको उम्मेदवारी दर्ता भएको बागमती प्रदेश निर्वाचन कार्यालयका सूचना अधिकारी सम्झना ढकालले जानकारी दिएकी हुन् । 
उम्मेदवारी दिनेमा डा. खिमलाल देवकोटा, कृष्णबहादुर तामाङ र रामबहादुर थापा रहेका छन् । देवकोटा स्वतन्त्र उम्मेदवारको रुपमा उम्मेदवारी दर्ता गराएका हुन् भने थापाले नेकपा एमालेबाट र तामाङले नेपाल मजदुर किसान पार्टीको तर्फबाट उम्मेदवारी दर्ता गराएका छन् । बैशाख २९ गते १० बजेदेखि १२ बजेभित्र उम्मेदवारको अन्तिम नामावली प्रकाशन गर्ने र सोही दिन १२ बजेदेखि ५ बजेसम्म उम्मेदवारलाई चुनाव चिन्ह वितरणको कार्यतालिका रहेको निर्वाचन कार्यालयले जनाएको छ ।
राष्ट्रियसभामा निर्वाचित थापाले आफू निर्वाचित भएको दल नेकपा माओवादी केन्द्र परित्याग गरेपछि रिक्त पदमा उपनिर्वाचन हुन लागेको हो । उपनिर्वाचनमा बागमती प्रदेशका १ सय १० प्रदेशसभा सदस्य र स्थानीय तहका प्रमुख र उपप्रमुख गरी २ सय ३८ गरी ३४८ जनाले मतदान गर्नेछन् । प्रदेशसभा सदस्यको मतभार ४८ र  स्थानीय तहका प्रमुख र उपप्रमुखको मतभार १८ रहेको छ ।