राष्ट्रियसभाः अंकगणितमा थापा बलियो, निर्णायक माधव समूह

२४ बैशाख, हेटौंडा । राष्ट्रिय सभा सदस्यको निर्वाचनमा अंकगणितीय रुपमा रामबहादुर थापा बादल बलियो देखिएका छन् । ३ जना उम्मेदवारमध्ये थापा अंकगणितका हिसावले बलियो देखिएका हुन् ।
बागमती प्रदेशमा नेकपा एमालेका ५७ जना प्रदेशसभा सदस्य र स्थानीय तहका जनप्रतिनिधि १ सय ३३ जना रहेका छन् । ५७ सांसदको ४८ मतभारका दरले २ हजार ७ सय ३६ मत र १ सय ३३ स्थानीय तहका जनप्रतिनिधिको १८ मतभारका दरले २ हजार ३ सय ९४ गरी थापाको पक्षमा ५ हजार १ सय ३० मत रहेको छ । तर यसमा माधव नेपाल समूहको मत निर्णायक बन्ने देखिन्छ । माधव नेपाल समूहले बादललाई मतदान नगरेको खण्डमा स्वतन्त्र उम्मेदवार डा. खिमलाल देवकोटा बलियो बन्ने छन् । उम्मेदवारी दर्ताका क्रममा एमाले माधव नेपाल समूहका नेताहरु देवकोटासंगै रहेकाले उनीहरुको मत देवकोटालाई जाने आंकलन गरिएको छ । तर ति नेताहरुले यसबारे खुलेर बताएनन् । 
देवकोटालाई नेकपा माओवादी, नेपाली कांग्रेस र जनता समाजवादी पार्टीको समर्थन रहेको छ । बागमती प्रदेशमा नेकपा माओवादी केन्द्रका २३ सांसद र ३३ जनप्रतिनिधि रहेका छन् । २३ सांसदको ४८ मतभारका दरले १ हजार १ सय ४ र ३३ स्थानीय तहका जनप्रतिनिधिको १८ मतभारका दरले ५९४ गरी १ हजार ६ सय ९८ मत रहेको छ । त्यस्तै, नेपाली कांग्रेसको २२ प्रदेशसभा सदस्यको ४८ मतभारका दरले १ हजार ५६ र ६७ स्थानीय तहका जनप्रतिनिधिको १८ का दरले १ हजार २ सय ७ गरी २ हजार २ सय ६३ मत रहेको छ भने समाजवादीको १ प्रदेशसभा सदस्यको मतभारले ४८ मत र स्थानीय तहको जनप्रतिनिधि १ जनाको मतभारको १८ गरी ६६ मत छ । यसरी हेर्दा देवकोटाको पक्षमा माओवादीको १ हजार ६ सय ९८, नेपाली कांग्रेसको २ हजार २ सय ६२ र समाजवादीको ६६ गरी ४ हजार २६ मत रहेको छ । 
त्यस्तै, नेमपिकाको तर्फबाट उम्मेदवार बनेका कृष्णबहादुर तामाङको नेमकिपाका २ प्रदेशसभा सदस्यको मतभारको हिसावले ९६ र २ स्थानीय तहका जनप्रतिनिधिको ३६ गरी १ सय ३२ मत रहेको छ । राष्ट्रियसभा निर्वाचनमा राप्रपाको २ प्रदेशसभा सांसदको मतभारको दरले ९६ र २ स्थानीय तहका जनप्रतिनिधिको मतभार ३६ का हिसावले १ सय ३२ मत रहको छ भने २ प्रदेशसभा सदस्य रहेको विवेकशिलको ९६ मत रहेको छ । यी दलले उम्मेदवारी दर्ता नगराएकोले कसलाई समर्थन गर्ने खुलेको छैन । विवेकशिलका सांसद रमेश पौड्यालले आफ्नो पार्टीले अहिलेसम्म कसलाई समर्थन गर्ने भन्ने बारे निर्णय नगरेको जानकारी दिए ।
अंकगणितको सोझो हिसावले रामबहादुर थापा बादल बलियो देखिएपछि नेकपा एमाले भित्रकै माधव नेपाल समूहले फ्लोर क्रस गर्ने सम्भावना रहेकाले देवकोटाले विजय हासिल गर्दा पनि अनौठो नहुने देखिन्छ ।