मकवानपुरमा सर्वसाधरणको आवतजावत नियन्त्रण गर्नुपर्नेमा जोड

२६ बैशाख, हेटौंडा । जिल्ला प्रशासन कार्यालय मकवानपुरले कोरोना रोकथाम, नियन्त्रण तथा उपचारबारे गरेका काम बारे हेटौंडाका पत्रकारहरुसंग छलफल गरेको छ । 

प्रमुख जिल्ला अधिकारी भरतमणि पाण्डेले जिल्लामा कोरोना नियन्त्रणका लागी भइरहेका गतिविधिका बारेमा जानकारी गराएका थिए । उनले मकवानपुरका ४ स्थानीय तहमा निषेधाज्ञा लगाईएको भएपनि यसको पूर्णपालना हुन नसकेको र सर्वसाधरणले कोरोना जोखिमप्रति वेवास्ता गरेको बताए । 

छलफलमा पत्रकारहरुले कोरोना परीक्षणको दायरा बढाउनुपर्ने, खाद्य सामाग्री स्थानीय पसलबाट खरिद गर्नुको सट्टा बजारसम्म आउने क्रमलाई रोक्नुपर्ने,  सुरक्षा निकायलाई बजार केन्द्रीत मात्र नभई भिडभाड हुने गरेका ग्रामीण क्षेत्रसम्म परिचालन गर्नुपर्ने लगायतका सुझाव दिएका थिए ।

उनीहरूले विरामी ओसारपसारमा एम्बुलेन्सको असहजता, बजारमा देखिएको कृत्रिम अभाव, मुल्य बृद्धि जस्ता विषयमा प्रशासनले ध्यान दिनुपर्नेमा जोड दिएका थिए ।

छलफल कार्यक्रममा नेपाल पत्रकार महासंघ बागमती प्रदेश महासचिव कृष्ण सारुमगर, पत्रकार महासंघ मकवानपुरका पुर्व अध्यक्ष राममणि दाहाल, प्रेस युनियन मकवानपुर अध्यक्ष कुमार अधिकारी सहित सहभागी पत्रकारहरूले निषेधाज्ञाको अवस्थाको र सुुुधार गर्नुपर्ने कुराको बारेमा प्रजिअ पाण्डेलाई ध्यानाकर्षण गराएका थिए।