ओली सरकार गठन भएदेखिनै संविधान भत्काउने काम भयोः देउवा

२७ बैशाख, हेटौंडा । प्रमुख प्रतिपक्षी दल नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओलीले सरकार गठन भएदेखि नै संविधान भत्काउने काम गरेको आरोप लगाएका छन् ।
प्रधानमन्त्रीले विश्वासको मत लिने प्रयोजनका लागि बोलाईएको प्रतिनिधिसभाको विशेष अधिवेशनको दोश्रो बैठकलाई सम्बोधन गर्दै संसदीय दलका नेता देउवाले वर्तमान सरकारले सरकार गठन भएदेखि नै संविधान भत्काउने काम गरेको आरोप लगाए ।
उनले ओली सरकारले  लोकतान्त्रिक मुल्य मान्यता तथा विधि र प्रक्रियालाई मिच्ने काम गरेको दाबी गरे । उनले जनताले दशकौं देखि गरेको ठूलो त्याग, तपस्या र अतुलनिय बलिदान पश्चात देशमा संघीय, लोकतान्त्रिक गणतन्त्रात्मक शासन व्यवस्था प्राप्त गरेको स्मरण गर्दे बलिदानवाट स्थापित लोकतान्त्रिक व्यवस्था र संविधान बमोजिम मुलुक चलेको छ ? भन्दै प्रधानमन्त्री ओलीलाई प्रश्न गरे ।
सभापति देउवाले राष्ट्रको कुटनीतिक क्षमता कमजोर भएको, विगतमा भएका सहमति समझौंताको कार्यान्वयन नभएका कारण देशको विश्वसनियतामा ह्रास आएको, प्रधानमन्त्री ओलीले अधिनायकवाद र सर्वसत्तावादी चरित्र देखाएको, संविधान, विधि र पद्धतिलाई नै समाप्त पार्ने काम गरेकाले मुलुक राजनीतिक जटिल अवस्थामा पुगेको टिप्पणी देउवाले गरे ।
सभापति देउवाले प्रधानमन्त्रीले राखेको विश्वासको मतको प्रस्ताव पास नहुने ठोकुवा गर्दै संविधानको धारा ७६ को उपधारा २ बमोजिम सरकार गठनको प्रक्रिया अघि बढाउन समेत आव्हान गरे ।