पत्रकार महासंघ मकवानपुरले संचारक्षेत्रलाई जारी गर्यो ९ बुँदे एड्भाइजरी

३० बैशाख, हेटौंडा । नेपाल पत्रकार महासंघ मकवानपुरले जिल्लाका संचारकर्मी र संचारगृहका लागि ९ बुँदे एड्भाइजरी जारी गरेको छ । 
महासंघ मकवानपुरका अध्यक्ष मणिराज गौतमले संचारकर्मी र संचारगृहलाई कोरोना जोखिमबाट जोगिन गर्न हुने र नहुने ९ बुँदे एड्भाईजरी जारी गरेका हुन् ।
विज्ञप्तिमा जोखिमको अवस्थामा आफ्नो कर्तव्य पुरा गर्न खटिएका संचारकर्मीहरूलाई नेपाल पत्रकार महासंघ मकवानपुरले मास्क, सेनेटाईजर जस्ता स्वास्थ्य सामग्रीको व्यवस्था गरेको अवगत गराउँदै यो सुविधाको उपयोग गर्न संचारकर्मीहरूमा महासंघले आग्रह गरेको छ । मकवानपुरमा हालसम्म नेपाल पत्रकार महासंघका ११ जना सदस्य पत्रकार कोरोना संक्रमित भइ होम आइसोलेसनमा रहेको र उनीहरूसंग महासंघ निरन्तर सम्पर्क रहेको जनाउँदै महासंघदे संक्रमित पत्रकारलाई नेपाल पत्रकार महासंघको कार्यसमिति र स्वास्थ्य समितिको टोलीले घरमै पुगेर भेट्नुका साथै स्वास्थ्य र फलफुल लगायतको सामग्री उपलब्ध गराई स्वास्थ्य अवस्थाबारे जानकारी लिने काम भएको जनाइएको छ ।
महासंघले संक्रमित पत्रकारहरूका लागि गौरीटारमा रहेको आइसोलेशनमा छुट्टै व्यवस्थाका लागि समन्वय गरेकाले होम आइसोलेसनमा बस्न समस्या भएको अवस्थामा महासंघमा सम्पर्क गर्न अनुरोध गरेको छ । बढ्दो संक्रमणसँगै अस्पतालमा आइसियु बेड, भेन्टिलेटर र अक्सिजनको अभाव देखिन थालेको जनाउँदै महासंघले यस्तो अवस्थामा स्वास्थ्य पूर्वाधारको थप व्यवस्था गरि नागरिकको जीवन रक्षाका लागि जुट्न सम्बन्धित सब‌ै पक्षसंग आग्रह गरेको छ । 
महामारीको यस घडीमा सबै पक्षसँग सहकार्यका लागि प्रतिबद्ध रहेको समेत महासंघले अवगत गराएको छ । 
अहिलेको जोखिमपूर्ण अवस्थामा संचारगृह र संचारकर्मीलाई नेपाल पत्रकार महासंघ मकवानपुरले यस्तो एड्भाईजरी जारी गरेको छ ।
१) सकभर फोन र सामाजिक सञ्जालको प्रयोग गरि दैनिक समाचार संकलनको काम गर्नु हुन ।
२) स्थलगत रूपमा समाचार संकलनमा जानु पर्दा कोरोना जोखिम न्यूनीकरणका लागि नेपाल सरकारद्वारा जारी स्वास्थ्य मापदण्डलाई पूर्ण पालना गर्नु हुन ।
३) स्थलगत रूपमा समाचार संकलनमा जानु पर्दा आफ्नो मिडिया, पेशागत संगठन वा महासंघले उपलब्ध गराएको प्रेस ज्याकेट लगाउनुहुन र मिडिया हाउसले उपलब्ध गराएको परिचय खुल्ने फोटोसहितको प्रेस कार्ड अनिवार्य देखिने गरी लगाउनु हुन ।
४) जाँचमा खटिएका सुरक्षाकर्मीले रोके आफ्नो परिचय स्पष्टसंग दिनुहुन र प्रेस कार्ड देखाउनु हुन । समस्या परे पत्रकार महासंघका पदाधिकारीहरूसंग समन्वय गर्नुहुन, जाँचमा खटिनु भएका सुरक्षाकर्मीहरूसंग वादविवाद नगर्नुहुन । 
५) संचारमाध्यमले गैरपत्रकारलाई अनावश्यक ढंगबाट प्रेस ज्याकेट र कार्ड उपलब्ध नगराउनु हुन । यस्तो कार्ड बोकेको अवस्थामा सुरक्षाकर्मीले नियन्त्रणमा लिए व्यक्ति स्वयं जिम्मेवार हुने ।
६) गैरपत्रकारले प्रेस ज्याकेट र कार्ड प्रयोग गरेको जानकारी भए पत्रकार महासंघ वा सुरक्षाकर्मीलाई जानकारी दिनुहुन ।
७) संचारमाध्यमले आफ्नो संचारगृहमा कार्यरत संचारकर्मीहरूलाई कोरोना संक्रमणको जोखिमबाट जोगाउन सकभर 'वर्क फ्रम होम' को व्यवस्था गर्नुहुन । नसकिने अवस्थामा स्वास्थ्य मापदण्ड पालना गराउनुहुन र स्वास्थ्य सामग्रीको व्यवस्था गर्नुहुन ।
८) जोखिम मोलेर संचारकर्ममा खटिनु भएका आफ्ना कर्मचारी संचारकर्मीहरूको सेवा सुविधालाई नियमित उपलब्ध गराउनुहुन ।
९) प्रदेश सरकारका विभिन्न निकाय र स्थानीय तहबाट संचारमाध्यमलाई विज्ञापन बापत उपलब्ध हुने कोरोना सम्बन्धी सन्देशका लागि सम्झौता गर्नुहुन । सामाजिक उतरदायित्व अन्तर कोरोना सम्बन्धी सचेतना सन्देश संचारमाध्यमबाट स्वस्फूर्त रूपमा सम्प्रेषण गर्नुहुन ।