संक्रमितको उपचारका लागि स्रोतको अभाव हुन दिईँदैनः मन्त्री पाण्डे

२ जेठ, नुवाकोट । बागमती प्रदेश सरकारका आन्तरिक मामिला तथा कानुन कानुन मन्त्री केशवराज पाण्डेले कोरोना संक्रमितहरुको उपचारमा स्रोतको अभाव हुन नदिईने स्पष्ट पारेका छन् । उनले कोरानाबिरुद्धको अभियानमा राज्यले लिएका नीतिहरुको पूर्ण कार्यान्वयनमा सबैको साथ आवश्यक रहेको धारणा ब्यक्त गरे ।
आईतबार नुवाकोट, रसुवा र धादिङका कोरोना संक्रमितहरुको उपचार गर्दै आएको त्रिशूली अस्पतालले उपलब्ध गराउँदै आएको सेवा र कोरोना उपचारका बिबिध पक्षहरुका बारेमा जानकारी लिएपछि अस्पताल ब्यवस्थापनसंगको अन्तरक्रियामा मन्त्री पाण्डेले अस्पतालमा आवश्यक जनशक्ति र स्रोतको बयवस्थापन गरी चाँडै नै आईसियु र एचडियु कक्षहरु थप गर्न प्रकृया अघि बढाईएको जानकारी समेत दिए । 
त्रिशूली अस्पताल प्रदेशकै नमुना अस्पतालको रुपमा रहेको र कोरोना संक्रमितको उपचारमा अस्पतालले उपलब्ध गराएको सेवाहरु प्रशंसनीय रहेको बताउँदै त्यसक्रममा प्रदेश सरकारको बिपद व्यवस्थापन समितिका संयोजक समेत रहेका मन्त्री पाण्डेले अस्पतालको ब्यवस्थापकीय र प्राबिधिक पक्षलाई अझ सुदृढ बनाउँदै कोरोना बिरुद्धको अभियानमा क्रियाशिल हुने सन्दर्भमा ब्यवस्थापनले अपेक्षा गरेको स्रोतको ब्यवस्थापन गरिने प्रतिबद्धता समेत जनाए । 
अस्पताल ब्यवस्थापन समितिका अध्यक्ष अर्जुन न्यौपाने र मेडिकल सुपेरिण्टेण्डेण्ट डाक्टर दिपेन्द्र पाण्डेले कोेरोना संक्रमितहरुको उपचारका क्रममा देखिएका समस्याहरु त्था तत्कालै अपनाईनुपर्नेे रणनीतिहरुका बारेमा मन्त्री पाण्डेको ध्यानाकर्षण गराएका थिए ।