प्रधानमन्त्रीले निर्वाचन आचारसंहिता विपरित अभिव्यक्ति दिएको भन्दै आपत्ति

५ जेठ, हेटौंडा । राष्ट्रियसभा निर्वाचनको आचारसंहिता विपरित प्रधानमन्त्री केपि शर्माले अभिव्यक्ति दिएको भन्दै निर्वाचन कार्यालयमा आपत्ति जनाइएको छ । 
कार्यालयले निर्वाचन आचारसंहिताबारे बुधबार गरेको छलफलमा राष्ट्रियसभा सदस्यका उम्मेदवार डा. खिमलाल देवकोटाका प्रतिनिधि भीम ढुंगानाले प्रधानमन्त्रीको अभिव्यक्तिप्रति आपत्ति जनाएका हुन् । उनले प्रधानमन्त्रीले अर्का उम्मेदवार रामबहादुर थापाको पक्षमा भोट माग्नु आचारसंहिता विपरित भएको भन्दै निर्वाचन कार्यालयको ध्यानाकर्षण गराएका थिए ।
प्रमुख निर्वाचन अधिकृत डिल्लीरत्न श्रेष्ठले यसबारे कार्यालयको ध्यानाकर्षण भएको बताउँदै यसबारे लिखित उजुरी दिन आग्रह गरे । श्रेष्ठले निर्वाचन स्वास्थ्य मापदण्ड पूरा गरि निर्वाचन गराउने प्रतिबद्धता व्यक्त गरेका थिए ।
कार्यक्रममा उम्मेदवारका प्रतिनिधि भीम ढुंगाना, अनन्त पौडेल, नागेन्द्र चौधरी लगायतले निर्वाचनमा पिसिआर रिपोर्ट नभएकाले पनि मत दिन पाउनुपर्ने, मतदान बुथभित्र विद्युतीय उपकरण प्रयोग गर्न नपाउने व्यवस्था गर्न, मतदानका लागि सहयोगीको दुरुपयोग रोक्नुपर्ने, जुमबाट निर्वाचन मतगणनालाई व्यस्थित गर्नुपर्ने धारणा गरेका थिए ।
राष्ट्रियसभा सदस्य निर्वाचनको मतदान बिहीबार विहान ९ बजेदेखि ३ बजेसम्म हेटौंडा-४ मा रहेको भुटनदेवी माविमा हुँदैछ ।