रोटरी क्लबको निशुल्क खाना खुवाउने अभियान:८४ जनाले खाए खाना

निशुल्क खाना खुवाउने अभियानको सुरुवात गर्दै मेयर महत

१२ जेठ,हेटौंडा।हेटौंडामा रोटरी क्लब अफ मकवानपुरको समन्वयमा बुद्ध जयन्तीको अवसरमा आजबाट सुरु भएको निशुल्क खाना खुवाउने अभियानमा ८४ जनाले खाना खाएका छन। 

कोरोना महामारी र जारी निषेधाज्ञामा दैनिक ज्यालादारी गर्ने मजदुरलाई लक्षित गरी रोटरी क्लब अफ मकवानपुरको समन्वमा आयोजना गरिएको निशुल्क खाना खुवाउने अभियानको पहिलो दिन ८४ जनाले खाना खाएका छन।बिहान १० बजेबाट दिउँसोको १ बजेसम्म संचालन गरिएको अभियानमा हेटौंडा-४ लोकतान्त्रिकचौर (हुप्रचौर)मा ४२ जना,हेटौंडा अस्पतालमा ३५ जना र हेटौंडा–१० मा रहेको  गोरक्षेश्वरधाममा ७ जना गरी कुल ८४ जनाले खाना खुवाइएको क्लबका अध्यक्ष कविन साँगामीले जानकारी दिएका छन। हेटौंडा नगरका प्रमुख हरि बहादुर महतले आज बिहान एक समारोहबीच खाना दिएर कार्यक्रमको थालनी गरेका थिए। 

आज(बुधबार)को खाना  पञ्च सिद्ध फाउन्डेसनको सहयोगमा खुवाइएको र निषेधाज्ञाभर बिहानको एक छाक खाना खुवाइने संगामीले बताए।क्लबको निशुल्क रुपमा खाना खुवाउने अभियानमा नेपाल पत्रकार महासंघ मकवानपुरका पूर्व अध्यक्ष राममणि दाहालले आफ्नो छोरा आयाम दाहालको आज परेको जन्मदिनको दिन पाँच हजार रकम सहयोग गरेका छन।त्यसैगरी अभियानमा हेटौंडा–२ पीपलबोटका व्यवसायी प्रदीप बज्राचार्यले १० हजार १ रुपैयाँ, महालक्ष्मी विकास बैंकको कमाने शाखाका प्रबन्धक रोशन सेन गुप्ताले २ हजार रुपैयाँ,रोटरी क्लब अफ मकवानपुरका सदस्य डा. डोजेद्र बस्नेत र डा. स्वेच्छा शाहले संयुक्तरुपमा ५ हजार रुपैयाँ, हेटौडा–४, स्कुलरोडका राहुल गुप्ताले एक दिनका लागि आवश्यक खाना राख्ने प्लास्टिक तथा कागजका सामग्रीहरु, एपी पेपर इण्डष्ट्रिज प्रालिका सञ्चालक विजयकुमार श्रेष्ठले १ हजार थान कागजका प्लेट सहयोग गरेका थिए।