कर्णाली प्रदेश सरकारमा कांग्रेसबाट दुई मन्त्री, शुक्रवार शपथ लिने

२० जेठ, हेटौंडा । नेपाली कांग्रेस कर्णाली प्रदेश सरकारमा सहभागी हुने भएको छ । कांग्रेस कर्णाली प्रदेशमा दुई मन्त्रालय लिएर सरकारमा जाने पक्का भएको हो । 
कांग्रेसले गत ३ वैशाखमा मुख्यमन्त्री पदमा महेन्द्रबहादुर शाहीलाई सघाएको थियो । कांग्रेसले विश्वासको मत दिएपछि उनी मुख्यमन्त्री बनेका थिए । 
कांग्रेस कर्णाली स्रोतका अनुसार सामाजिक विकास मन्त्रालय र जलस्रोत तथा ऊर्जा मन्त्रालयसहित कांग्रेस सरकारमा जाने भएको हो । कर्णालीमा कांग्रेसबाट यज्ञबहादुर बिसी र दिनवन्धु श्रेष्ठ मन्त्री बन्ने भएका हुन् । 
उनीहरू दुई मध्ये बिसीले सामाजिक विकास र श्रेष्ठले ऊर्जा मन्त्रालय सम्हाल्ने सहमति बनिसकेको छ । कांग्रेस प्रदेश संसदीय दलका नेता जीवनबहादुर शाहीले को को मन्त्री बन्नेबारे भने छलफल भइरहेको बताए । 
कांग्रेसले तोकेका व्यक्तिलाई आजै मन्त्री नियुक्त गरिने तयारी भइरहेको छ । तर शपथ भने भोलि (शुक्रवार) हुने बताइएको छ । प्रदेश सरकारमा हाल सामाजिक विकास मन्त्रालय र जलस्रोत तथा ऊर्जा मन्त्रालय खाली छ । 
एमालेले समर्थन फिर्ता लिएपछि ३ वैशाखमा मुख्यमन्त्री शाहीले विश्वासको मत लिएका थिए । विश्वासको मत लिँदा काँग्रेस र एमालेको नेपाल समूहका चार जना सांसदले फ्लोर क्रस गरेर मुख्यमन्त्री शाहीलाई विश्वासको मत दिएका थिए ।