हेटौडा-४मा निर्माणाधीन स्वास्थ्य चौकीमा कमशल सामान प्रयोग भएको भन्दै ध्यानाकर्षण

२२ जेठ, हेटौंडा । हेटौंडा उपमहानगरापालिका वडा नम्बर ४ मा निर्माणाधीन मोहन बज्राचार्य शहरी स्वास्थ्य चौकी भवन निर्माणमा मापदण्ड विपरीत कमसल निर्माण सामाग्री हालिएको भन्दै स्थानीयबासी र कांग्रेस ४ नम्बर समितिले ध्यानाकर्षण भएको बताएका छन् । 

स्वास्थ्यचौकी भवन निर्माणमा मापदण्डविपरीत कमसल निर्माण सामाग्री प्रयोग गरेको गुनासो आएको भन्दै नेपाली कांग्रेस हेटौंडा–४ नम्बर वडा समितिले समेत ध्यानाकर्षण जनाएको छ । 

वडा सभापति हरिप्रसाद पौडेलले एक विज्ञप्ति जारी गर्दै गुनासो आएपछि अनुगमनमा जाँदा निर्माणस्थलमा परियोजना कार्य विवरणसमेत नभएको बताएका छन् । रातमा काम हुने गरेको प्रति पनि आपत्ति जनाइएको छ । 

निर्माण कार्य मापदण्डअनुसार गर्न र गुणस्तरीय सामाग्रीको प्रयोग गर्न कांग्रेसले ध्यानाकर्षण गराएको छ । अन्यथा कानुनी प्रक्रियामा जानेसमेत चेतावनी दिएको छ । यसबारेमा बुझ्न वडाध्यक्ष नविन सिग्देललाई सम्पर्क गर्दा उनको मोबाइलमा सम्पर्क हुन सकेन ।यता शुक्रबार राति स्वास्थ्यचौकी भवन निर्माणको काम भइरहेको जानकारी पाएपछि स्थानीय सुनिल गिरीसहितका युवाहरु निर्माणस्थलमा पुगी निरीक्षण गरेका थिए । उनीहरुले समेत निर्माण समाग्री कमसल प्रयोग भएको पाईएको बताए ।

उनले भने– ‘निर्माणको काम रातमा किन गरियो, पहिलो आशंका यहिँ छ, हामी गएर हेर्दा दुइ गाढा गिट्टी र २ गाढा बालुवामा एक बोरा मात्रै सिमेन्ट घोलेर हालिरहेको पाइयो, निर्माणको मापदण्डबारे जानकारहरुसँग बुझदा दुइ÷दुई गाढा बालुवा र गिट्टी राखेपछि एक गाढा सिमेन्ट हाल्नुपर्ने भन्ने थाहा पाइयो । यो लापरबाही हो ।’ रातको समयमा भइरहेको निर्माणस्थलमा प्राविधिकसमेत नरहेको गिरीले बताए ।