ओलीको एकता प्रस्ताव भ्रम मात्रैः नेपाल–खनाल पक्ष

२५ जेठ, हेटौंडा । नेकपा एमालेको माधवकुमार नेपाल र झलनाथ खनाल पक्षले प्रधानमन्त्री एवम् पार्टी अध्यक्ष केपी शर्मा ओलीले पार्टी एकताका लागि गरेको आह्वान भ्रम मात्रै भएको दावी गरेको छ ।
सोमबार ओलीको प्रस्तावको जवाफ दिँदै नेपाल–खनाल पक्षका नेता माधवकुमार नेपालले अध्यक्ष एवं प्रधानमन्त्री केपी शर्मा ओलीको ६ बुँदे प्रस्तावको भ्रममा नपर्न नेता तथा कार्यकतालाई आग्रह गरेका छन् ।
आइतबार ओलीले पार्टी एकताको आह्वान गर्दै जारी गरेको ६ बुँदे प्रस्तावको जवाफमा सोमबार प्रेस वक्तव्य सार्वजनिक गर्दै नेपालले प्रधानमन्त्री ओलीको वक्तव्यमा प्रयोग गरिएको भाषा र बुँदाहरु केलाउँदा जालझेल, अन्योल र भ्रमको आधारमा अरूलाई अल्मल्याउने र विभाजित गर्ने दुराशय देखिएकोले वक्तव्यको भ्रममा नपरी सशक्त रुपमा पार्टीको समग्र एकता, संगठन निर्माण र सञ्चालनको मार्गमा अघि बढ्न आव्हान गरिएको छ ।
प्रेस वक्तव्यमा ओलीले पार्टी एकता हासिल गर्ने भन्दा अनेकता सिर्जना गर्नेतर्फ लक्षित भएको आरोप लगाएको छ । प्रधानमन्त्री केपी शर्मा ओलीले प्रतिनिधिसभा विघटनको निर्णय फिर्ता लिनुपर्नेमा आफूहरू स्पष्ट रहेको पक्षद्वारा जारी वक्तव्यमा उल्लेख गरिएको छ ।
पार्टी एकताका लागि अध्यक्ष ओलीले कांग्रेस सभापति शेरबहादुर देउवाका पक्षमा गरिएको हस्ताक्षर फिर्ता लिनुपर्ने शर्त राखेका थिए । ओलीले शर्त राखेको भोलिपल्ट बसेको नेपाल पक्षको स्थायी कमिटी बैठकले प्रतिनिधिसभा विघटनको निर्णय फिर्ता लिए हस्ताक्षरको विषय आफैं समाधान हुने तर्क अघि सारेको छ ।