मकवानपुर गढीका नदी तोकिएको भन्दा बढी उत्खनन,विवरण सार्वजनिक नगरे ताला लगाउने

२९ जेठ, हेटौंडा। मकवानपुर गढी गाउँपालिकामा हुन नदी उत्खनन तोकिएको भन्दा बढी रहेको जनाइएको छ। शनिबार नेपाली कांग्रेस  मकवानपुर गढी गाउँपालिकाले गाउँपालिकाको वडा नम्बर-२ बासपानीमा आयोजित पत्रकार सम्मेलनमा मकवानपुरगढीमा नदी उत्खनन तोकिएको भन्दा बढी रहेको र  गाउँपालिकाका कर्मचारी र निर्देशन अनि अनुगमन गर्ने जनप्रतिनिधिको मिलेमतोमा राजश्व व्यक्तिको गोजीमा पुराइएको आरोप लगाएको छ। 

गत चैत्र १६ गते देखी ३१ गते सम्म सामरी खोलाको विभिन्न स्थानबाट उत्खनन् गरिएको नदीजन्य पदार्थ जिल्ला दैविक प्रकोप उद्दार समितिबाट प्राप्त अनुमति जम्मा एक लाख २५ हजार २ सय घनमिटर उत्खनन् गर्ने भनिएता पनि गाउँपालिकाले कर्मचारी र जनप्रतिनिधिको सेटिङमा एक लाख ३५ हजार घनमिटर उत्खनन् भएको पाइएको  नेपाली कांग्रेस मकवानपुरगढी गाउँपालिका सभापति राजवीर मोक्तानले बताए।

नेपाली कांग्रेस मकवानपुरगढी गाउँपालिकाले सत्यतथ्य जानकारी गराउन गाउँपालिका अध्यक्ष विदुर हुमागाईलाई पत्र हस्तान्तरण पश्चात सामरी खोलाको विभिन्न ११ स्थानबाट एक लाख ३५ हजार १३ घनमिटर उत्खनन् गरिएको भनी जानकारी पत्र दिएको तर ११ वटै स्थानका परिमाण अनुमानित दुई लाख घन मिटर जति देखिन्छ जुन आर्थिक अनियमितता गर्ने उद्देश्यले गुपचुप गर्ने प्रयास गरिएको मोक्तानले बताए । 

'उत्खनन् गरेर राखिएको नदीजन्य पदार्थ पुन नापजाँच हुनुपर्छ भनेर माग राख्दा जिल्ला समन्वय समितिको प्राविधिक टोलीले बाँसपानी नजिक झोलुङ्गे पुल मुनी संकलन गरिएको परिणाम नाप गर्दा १० हजार ३०० घनमिटिर भएको तर गाउँपालिकाबाट खटिएका कर्मचारी र इन्जिनियर सहितका टोलीले उक्त परिणामको नाप ५ हजार ७ सय १२ भनी गलत  विवरण राखेको छ- मोक्तानले भने ।

यता नेपाली कांग्रेस संघीय प्रतिनिधि सभा क्षेत्र २ का सभापति यतिराज सापकोटाले गाउँपालिकामा कांग्रेसबाट निर्वाचित सबै जनप्रतिनिधि यस कार्यको विरुद्धमा उभिएको बताउदैं सही विवरण नआए गाउँ पालिकाको कार्यालयमा  ताला लगाउने बताए । 

पत्रकार सम्मेलनमा नेपाली कांग्रेस जिल्ला सदस्य अर्जुन प्रसाद दाहाल, गाउँपालिका सचिव रामशरण धिताल, तरुण दल अध्यक्ष सानोकान्छा थिङ लगायत वडा सभापतिहरुको उपस्थिती रहेको थियो ।