कांग्रेसले गर्यो बागमती प्रदेशको बजेट समीक्षा, जनताको नभई नेताको बजेट

५ असार, हेटौंडा । नेपाली कांग्रेस बागमती प्रदेश संसदीय दलले बागमती प्रदेशको आव ०७८/०७९ को बजेटबारे समीक्षा गरेको छ ।
समिक्षामा संसदीय दलका नेता ईन्द्रबहादुर बानियाँले बागमती प्रदेश सरकारले सदनमा प्रस्तुत गरेको बजेटले जनताको अपेक्षा पूरा नगरेको भन्दै मन्त्री र सत्तापक्षका केही नेताको मनको मात्रै चाहना पूरा गर्ने बताए । उनले कोरोना संक्रमणको जोखिम न्यूनीकरण, उपचार, पूर्वाधार विकास र राहतमा स्पष्ट कार्यक्रम दिन नसकेको बताए । उनले बजेटमा समाजवाद उन्मुख लेखिएपनि जनताको हितमा नभएको दिशाहिन दस्तावेज बनेको बताए ।
कार्यक्रममा सांसदहरूले समानुपातिक र न्यायोचित ढंगले बजेट नआएको बताउँदै सत्तापक्षीय केही नेता र आसेपासे कार्यकर्ता पोस्ने खालको बजेट रहेकोमा आपत्ति जनाए ।
कार्यक्रममा सरकार आफैंले संचारगृह चलाउने जस्तो गैरलोकतान्त्रिक कार्यक्रम ल्याउनुले स्वतन्त्र संचारक्षेत्रलाई धरासायी बनाउँदै आफ्नो गुनगान गाउने सरकार नियन्त्रित संचारगृह स्थापनाको अभिष्ट प्रष्ट भएको छलफल भएको थियो । सरकार विकास र जनतालाई राहत दिने कुराबाट बरालिएको सांसदहरूको भनाइ थियो ।
कार्यक्रममा सिन्धुपाल्चोकको मेलम्चीसहित प्रदेशका विभिन्न जिल्लामा पछिल्ला केही दिनमा भएका विपदका घटनाबारे छलफल गर्दै राहत र उद्धारको काममा जुट्न प्रदेशका नेपाली कांग्रेसका सबै नेता कार्यकर्तालाई आव्हान गरिएको छ । आवश्यकताका आधारमा प्रदेश संसदीय दलको सहयोग गर्ने समेत छलफद भएको छ । 
समिक्षा एवं अन्तरक्रिया कार्यक्रममा नेपाली कांग्रेस केन्द्रीय प्रशिक्षण विभागका सदस्य राजु नेपालले सहजिकरण गरेका थिए ।