माओवादीबाट एमाले प्रवेश गरेका १४ जनप्रतिनिधि पदमुक्त 

११ असार, हेटौंडा । निर्वाचन आयोगले माओवादी केन्द्रबाट चुनाव जितेर एमाले प्रवेश गरेका १४ जना जनप्रतिनिधि पदमुक्त भएको जनाएको छ ।
माओवादी केन्द्रले कारबाही गरेपछि आयोगले १४ जनप्रतिनिधिको पद रिक्त गरेको हो । २०७४ सालको चुनावमा माओवादी केन्द्रको तर्फबाट उमेद्ववार भएर विजयी भएका तर दल त्याग गरेका उनीहरूलाई माओवादी केन्द्रले पदमुक्त गर्न माग गर्दै निर्वाचन आयोगलाई यसअघि जानकारी गराएको थियो । 
त्यसैका आधारमा आयोगले निर्णय गरिएको विज्ञप्ति मार्फत जानकारी गराएको छ । पदमुक्त भएकामध्ये दुई मेयर र पाँच उपमेयर सहित १४ जनप्रतिनिधि रहेका छन् । 
आयोगका अनुसार रौतहटको मौलापुर नगरपालिकाका मेयर रिनाकुमारी शाह र कटहरीया नगरपालिकाका मेयर सियाराम प्रसाद कुशवाह, महोत्तरीको साम्सी गाउँपालिकाका अध्यक्ष शेष फारुक, रौतहटको देवाहीगोनाही नगरपालिकाका उपमेयर परनिया देवी, मौलापुर नगरपालिकाका उपमेयर गौरिशंकरप्रसाद रहेका छन् । 
यसैगरी फतुवाविजयपुर नगरपालिकाका उपमेयर कान्ति देवी, माधवनारायण नगरपालिकाका उपमेयर सिमलकुमारी शाह, यमुनामाई गाउँपालिकाका उपाध्यक्ष गीतादेवी साह र कैलालीको भजनी नगरपालिकाका उपमेयर छायाँदेवी देवकोटा पदमुक्त भएका छन् ।
ओखलढुंगाको चम्पादेवी गाउँपालिका ७ का वडा अध्यक्ष सुरेश कुमार थापा, कैलालीको गौरीगंगा नगरपालिका ४ का वडा अध्यक्ष भागरथी विष्ट, गोदावरी नगरपालिका १ का शर्मानन्द भट्ट र बर्दगोरिया नगरपालिका ४ का वडा अध्यक्ष पुरन सिंह विसीपनि पदमुक्त भएको आयोगले निकालेको सूचनामा जनाईएको छ ।