प्रदेश सरकारले संचारगृह चलाए कांग्रेस नेतृत्वको सरकारले खारेज गर्छ: बानियाँ

१५ असार, हेटौंडा । नेपाल पत्रकार महासंघ केन्द्रीय समितिको आयोजना एवं मकवानपुर शाखाको संयोजनमा प्रदेशको संचार नीतिबारे संवाद कार्यक्रम आयोजना गरिएको छ ।
कार्यक्रममा प्रदेश सरकारले संचार क्षेत्रमा ल्याएका नीति, त्यसको सकारात्मक एवं नकारात्मक असरबारे कार्यक्रममा छलफल भएको थियो ।
बागमती प्रदेश प्रतिपक्षी दल नेपाल कांग्रेस संसदीय दलका नेता इन्द्रबहादुर बानियाँको प्रमुख आतिथ्यता एवं पत्रकार महासंघ मकवानपुर शाखाका अध्यक्ष मणिराज गौतमको सभाध्यक्षतामा कार्यक्रम भएको थियो ।
कार्यक्रममा बोल्दै नेता बानियाँले प्रदेश सरकारले ल्याउने संचारहित विपरीतका कार्यक्रमप्रति आफुहरूको विमति रहने बताए । उनले प्रदेश सरकारले स्वतन्त्रतामाथि अंकुश लगाउन खोजेको बताए । संचार जगतलाई बलियो र सूचनाको हकलाई प्रवर्द्धन भन्दा सरकार कानून मिच्ने कामतर्फ अघि बढेको बताए । 
उनले सरकारले संचारगृह चलाउने बजेट ल्याउन खोजेकोमा कांग्रेसले विरोध गर्ने र अंकगणितीय बलका आडमा पास गरे कांग्रेस नेतृत्वको सरकारले खारेज गर्ने प्रतिबद्धता व्यक्त गरे । प्रदेश सरकारले कुनै पनि हालतमा संचारगृह संचालन गर्न नहुने बरू प्रदेशका श्रमजीवी पत्रकारलाई प्रोत्साहन गर्नुपर्नेमा जोड दिए । सरकारले आफ्नो गलत कामको ढाकछोप गर्न संचारगृह खोल्नु लोकतन्त्र विरोधी गतिविधि भएको बताए ।
कार्यक्रममा प्रदेशसभा सदस्य प्रेमबहादुर पुलामीले सरकारलाई राम्रो कामका लागि सुझाव दिएको बताउँदै सरकार आफ्नै स्वार्थमा केन्द्रित भएको बताए । सरकारले संचारगृह संचालन गर्न अग्रसर हुनु भनेको मुर्खता भएको बताए । तर लोकतन्त्रमा यस्तो कामको विरूद्धमा प्रतिपक्ष दल अघि बढ्ने बताए । सरकारविरूद्ध आफुहरूले संसदमा लड्ने बताए ।
कार्यक्रममा जिल्ला समन्वय समिति मकवानपुरकी उपप्रमुख भगवती पुडासैनी, पत्रकार महासंघका केन्द्रीय सचिव सिर्जना अर्याल, पत्रकार महासंघ बागमती प्रदेशका अध्यक्ष शिव देवकोटा, संस्थापक अध्यक्ष प्रताप बिष्ट, केन्द्रीय सदस्य सुनिल खड्का र ध्रुव रावल, ब्रोडकाष्टिङ एशोसियसनका कार्यवाहक अध्यक्ष उज्ज्वल चौलागाईं, आन्तरिक मामिला मन्त्रालयका उपसचिव नारनप्रसाद पोखरेल, प्रेस रजिष्टार रेवती सापकोटा, प्रेस चौतारी मकवानपुर अध्यक्ष धर्मेन्द्र दाहाल लगायतले मन्तव्य व्यक्त गरेका थिए ।