पार्टीलाई २०७५ जेठ २ गतेको स्थितिमा फर्काउने एमालको निर्णय 

१६ असार, हेटौंडा । एमालेको स्थायी कमिटीको बैठकले दशौं महाधिवेशन आयोजक कमिटीलाई २ जेठ २०७५ अवस्थाको केन्द्रीय कमिटीमा रुपान्तरण गर्ने निर्णय गरेको छ ।
प्रधानमन्त्री निवास बालुवाटारमा मंगलबार बसेको बैठकले महाधिवेशन आयोजक कमिटिलाई केन्द्रीय कमिटिमा रुपान्तरण गर्ने निर्णय गरेको हो ।
बैठकले असार १८ गते केन्द्रीय कमिटिको बैठक बोलाउने पनि निर्णय गरेको पार्टी प्रवक्ता प्रदीप ज्ञवालीले जानकारी दिए । आउँदो शुक्रबार बस्ने केन्द्रीय कमिटी बैठकले पार्टी बिवादका धेरै विषय टुंग्याउने प्रवक्ता ज्ञवालीको भनाइ छ ।
एमाले वरिष्ठ नेता झलनाथ खनाल र माधव नेपाल पक्षले भनृ नवौं महाधिवशेनको संगठनात्मक ढाँचामा पार्टीलाई फर्काउनुपर्ने माग राखेको छ । तर प्रधानमन्त्री एवम् पार्टी अध्यक्ष केपी शर्मा ओली पक्षले भने यसबारेमा प्रष्ट धारणा सार्वजनिक गरेको छैन ।
पुरानो संरचनालाई व्यूँताउँदा माओवादीसँगको एकताको बेलामा थपिएका केन्द्रीय सदस्यको हैसियत के हुने भन्नेमा बिषयमा समेत दुई पक्षबीच सहमति हुन सकेको छैन ।
२०७७ फागुन २३ गते सर्वोच अदालतले एमाले र माओवादीलाई पूर्व अवस्थामा फर्काइदिएपछि ओलीले खनाल–नेपाल समूहलाई पार्टी कमिटीका बैठकमा सहभागि गराएका छैनन् ।
ओलीले नवौं महाधिवेशनको कमिटीनै भंग गरेर दशौं महाधिवेशन आयोजक कमिटी बनाएका छन् । महाधिवेशन आयोजक कमिटीमा माओवादी केन्द्र परित्याग गरि एमाले प्रवेश गरेका रामबहादुर थापा, टोपबहादुर रायामाझी, लेखराज भट्टसहित २३ जनालाई मनोनित गरेका थिए ।