ससर्त अनुदान र संचारगृह चलाउने विषयमा प्रतिपक्ष दलहरूबाट बागमती प्रदेशसभा अवरुद्ध

१९ असार, हेटौंडा । बागमती प्रदेशसभाको बैठक शनिबार अवरुद्ध भएको छ ।
विनियोजन विधेयकमाथिको छलफल प्रारम्भ भए लगतै प्रतिपक्षी दलले संसद अवरूद्ध गरेका हुन् । सरकारले पक्षपाती ढंगले बजेट ल्याएको, बजेट पुस्तिकामा न्यायोचित वितरण नदेखिएको र प्रदेश सरकारले आफै संचारगृह चलाउने विषय फिर्ता लिनुपर्ने लगायका विषयलाई लिएर नेकपा माओवादी र  नेपाली कांग्रेसले संसद अवरुद्ध गरेका हुन् ।
अवरुद्ध गर्नु अघि बोल्दै माओवादी संसदीय दलका नेता शालिकराम जम्कट्टेलले स्थानीय तहमा जाने ससर्त अनुदान बजेटमा समेत पूर्वाग्रही ढंगले विनियोजन गरेको भन्दै आपत्ति जनाए । उनले ससर्त बजेट नसच्याउने भए बजेट छलफद अघि नबढ्ने बताए । उनले सुरूङमार्ग र बिद्युतीय बसबारेसमेत असन्तुष्टि व्यक्त गर्दै बजेटबाट हटाउन माग गरे । ऐन नै नभएको अवस्था र देश आर्थिक रूपमा टाट पल्टने अवस्थामा प्रदेश सरकारले आफै संचारगृह चलाउने विषय फिर्ता लिनुपर्ने उनले बताए ।
कांग्रेस संसदीय दलका नेता इन्द्रबहादुर बानियाँले सिन्धुपाल्चोकलाई सरकारले झुक्याएको बताए । उनले पूर्वाग्रही ढंगले बजेट विनियोजन र कार्यान्वयन गरिरहेको बताए । सरकार संविधान र संघीय लोकतान्त्रिक गणतन्त्रलाई कमजोर बनाउन संघीय सरकारको इकाइको रूपमा अघि बढेको भन्दै आपति जनाए । उनले बजेट पुस्तिका नै दुई ढंगको नआउनु गलत भएको भन्दै एउटै पुुस्तक बनाएर नआएसम्म संसद अघि बढ्न नसक्ने बताए । विपदमा परेका जिल्लालाई सरकारले व्यवस्था गर्न नसक्ने भए कांग्रेसले आफ्नो सेवा सुविधा जनताको राहतमा खर्चिन तयार रहेको बताए । उनले स्वतन्त्र संचारगृह चलाउन सहयोग गर्नुभन्दा सरकार आफैले संचारगृह चलाएर नराम्रो कुरा पनि राम्रो भनेर प्रचार गर्न खोजिएकाले बजेट फिर्ता लिनुपर्नेमा जोड दिए । अन्यथा संसद अघि बढ्न नसक्ने उनको भनाइ थियो ।
बैठकमा सांसद रमेश पौड्यालले असार १ गते बजेट पेश गरेर लामो समय छलफल भएकोमा आपत्ति जनाउँदै सिन्धुपाल्चोक क्षेत्रमा यातायात सुचारू गर्नुपर्नेमा जोड दिए । उनले विधि र प्रक्रिया बिपरित समय नै नदिई बजेटका २ वटा पुस्तक छापेर अनधिकृत काम भएको बताए । संसदको अवहेलना गर्दै भएको गलत कामबारे यसको जवाफ मूख्यमन्त्रीले जवाफ दिनुपर्ने बताए । मिडिया हाउस सरकारले चलाउनु गलत हुने बताए ।
सांसद सुरेन्द्रराज गोसाईले प्राकृतिक विपदी र कोभिड-१९ को मारमा परेका जनतालाई बजेटले सम्बोधन नभएको बताए । सरकारले चलाउने मिडिया हाउस निष्पक्ष ढंगले चलाउनुपर्ने तर देशमा माफियाहरूलाई हालिमुहाली गर्ने ढंगले आउन नहुने बताए । संचारगृह र विद्युतीय बस संचालन गर्ने बारे बृहत् छलफल आवश्यक रहेको उनको भनाइ छ ।
यसलगतै सभामुख सानुकुमार श्रेष्ठले आइतबार विहान ११ बजेसम्मका लागि स्थगित गरेका छन् ।
यसअघि, आर्थिक मामिला तथा योजनामन्त्री कैलाश ढुंगेलले विनियोजन विधेयक २०७८ माथि विचार गरियोस् भन्ने प्रस्ताव राखेका थिए ।