प्रदेश सरकारले संचारगृह चलाउने कार्यक्रममा खर्च कटौति प्रस्ताव दर्ता

२० असार, हेटौंडा । बागमती प्रदेश सरकार आफैंले संचारगृह संचालन गर्न ल्याएको कार्यक्रममा बागमती प्रदेशसभामा खर्च कटौति प्रस्ताव दर्ता भएको छ । संचारगृह संचालन गर्ने कार्यक्रमको विरोधमा विभिन्न दलका सांसदहरुले खर्च कटौती प्रस्ताव दर्ता गराएका हुन् । 
अहिलेसम्म नेपाली कांग्रेसका सांसद प्रभात तामाङ, नेकपा माओवादी केन्द्रका सांसद सिता अधिकारी र विवेकशिल साझा पार्टीका सांसद रमेश पौड्यालले खर्च कटौति प्रस्ताव दर्ता गराएको जानकारी दिएका छन् । ‘सरकारले सरकार राम्रोसंग चलाउन सकेको छैन अनि मिडिया हाउस चलाउनेतिर लाग्नु गलत हो’–सांसद तामाङले भने–‘स्वतन्त्र प्रेसलाई नियन्त्रण गर्ने मनसाय र कार्यकर्ता पाल्ने नियतले संचारगृह संचालन गर्न खोजेकाले कांग्रेसको तर्फबाट खर्च कटौतिको प्रस्ताव गरेको छु ।’ 
संसदमा उनीहरुसहित अन्य सांसदहरुले पनि प्रदेश सरकार आफ्नो कामबाट बरालिएर संचारक्षेत्रलाई अंकुश लगाउन अग्रसर भएको भन्दै विरोध गरेका थिए । यही विषयलाई समेत विरोधमा प्रतिपक्ष दलहरुले शनिबारकोप्रदेशसभा बैठक अवरुद्ध गरेका थिए । सरकारले आमसंचारगृह संचालन गर्ने निर्णयको नेपाल पत्रकार महासंघ केन्द्रीय समिति, बागमती प्रदेश समितिसहित पत्रकार महासंघ जिल्ला शाखाहरुले विरोध गरेका छन् । उनीहरुले विभिन्न दल र सांसदहरुलाई यो कार्यक्रम खारेजीका लागि पहलका लागि ज्ञापनपत्र समेत बुझाएका छन् ।