बागमती प्रदेशको बजेट बहुमत*ले पारित

२७ असार, हेटौंडा । बागमती प्रदेश सरकारले आगामी आर्थिक बर्ष ०७८/०७९ का लागि ल्याएको बजेट बहुमतले पारित भएको छ । बागमती प्रदेशसभामा आइतबार विनियोजन विधेयकमाथिको छलफल सकिएपछि बजेट पारित भएको हो ।
बजेटमा नेकपा माओवादी केन्द्र, नेपाली कांग्रेस, विवेकिशल साझा पार्टी र नेमकिपाका सांसदले राखेको खर्च कटौति प्रस्ताव बहुमतले अस्विकृत भएको छ भने बजेट बहुमतले पारित भएको छ । यसअघि विषयगत मन्त्रालयमा सांसदहरुले उठाएका प्रश्नहरुको सम्बन्धित मन्त्रीले जवाफ दिनु भएको थियो । विपक्षी दलहरुले संसद अवरुद्ध गरेका विषयबारे स्पष्ट पार्दै मूख्यमन्त्री डोरमणि पौडेलले सरकारले सबैसंग समन्वय गरी विकास अघि बढाउने प्रतिवद्धता व्यक्त गरेका थिए ।
बजेटमाथिको छलफलमा विपक्षी सांसदहरुले बजेट पारित गर्ने हतारले सबै मन्त्रालयको एकमुष्ठ छलफल गराएको, बजेटलाई समानुपातिक र आवश्यकताका आधारमा भन्दा आगामी निर्वाचन केन्द्रित गरेर विनियोजन गरेको लगायतको विषयमा धारणा राखेका थिए । त्यस्तै सत्तापक्षीय सांसदहरुले भने बजेटले सबै क्षेत्र, बर्ग र भुगोललाई समेटेको बताएका थिए । बैठक संचालन हुँदै गर्दा विद्युत आपूर्ति बन्द भएपछि सोमबार बजेटबारे थप प्रक्रिया अघि बढाउन विपक्षी दलले गरेको प्रस्ताव सभामुख सानुकुमार श्रेष्ठले वेवास्ता गरेपछि विपक्षी दलहरुले बैठक बहिस्कार गरेका थिए ।  *बहुमतले पारित हुनुपर्नेमा अन्यथा भएकोमा सच्याइएको छ ।