विघठित संसदविरुद्धको मुद्दाको फैसला आज आउने सम्भावना

२८ असार, हेटौंडा । प्रधानमन्त्री केपी शर्मा ओलीको सिफासिरमा राष्ट्रपति विद्या भण्डारीले दोस्रोपटक गरेको प्रतिनिधिसभा विघटन सम्बन्धि मुद्दाको फैसला आज आउने सम्भावना रहेको छ । गत असार २१ गते बहस सकिएपछि मुद्दाको पेशी आजका लागी तोकिएको थियो ।
प्रतिनिधि सभाको मुद्दा माथीको बहस गत सोमबार सकिएसँगै सर्वोच्च अदालतले यो मुद्दालाई हेर्दाहेर्दैमा आजका लागि पेसी तोकेको थियो । संवैधानिक इजालसले सम्भवतः आजै फैसला दिने अनुमान गरिएको छ । आज नभ्याए अर्को दिनको लागि पेसी तोकिनेछ । 
संवैधानिक इजालसमा प्रधानन्यायाधीश चोलेन्द्रशम्शेर जबरा, न्यायाधीशहरू दीपककुमार कार्की, मीरा खड्का, ईश्वरप्रसाद खतिवडा र आनन्दमोहन भट्टराई रहेका छन् । न्यायाधीशहरुबीच मतभेद नभए सर्वसम्मत र मतभेद भएमा बहुमतको राय मान्ने हुने गरी निर्णय हुनेछ । 
असार ९ गतेदेखि गत सोमबारसम्म निरन्तर ३२ घण्टाभन्दा बढी समय संवैधानिक इजलासमा सुनुवाइ भएको थियो । निवेदक, सरकारी वकिल, प्रधानमन्त्री केपी शर्मा ओलीका निजी कानुन व्यवसायी, सभामुख अग्निप्रसाद सापकोटाका निजी कानुन व्यवसायी, एमिकस क्युरी हुँदै निवेदनको जवाफी बहस सुनेर इजलासले आजका लागि पेशी तोकेको हो ।
सो मुद्दामा पक्ष, विपक्ष, एमिकस क्युरीसहित ८२ जनाले आफ्नो तर्क राखेका थिए । ती बहसका तर्क, तथ्य, पेश भएका नजिर, विदेशी सन्र्दभ सामग्री र बहस नोट न्यायाधीशले अध्ययन गरेका छन् ।